Ushtria Bjelloruse ka filluar një inspektim të paparalajmëruar më parë të Forcës së saj të Reagimit, duke planifikuar lëvizjen e një sasie të konsiderueshme të pajisjeve ushtarake, sipas një deklarate të publikuar nga Ministria e Mbrojtjes e Bjellorusisë në kanalin e saj Telegram të mërkurën, shkruan CNN.

“Në Forcat e Armatosura të Bjellorusisë ka filluar një inspektim i befasishëm i Forcave të Reagimit, gjatë të cilit njësitë dhe nënnjësitë ushtarake do të duhet të punojnë për çështjet e përgatitjes, marshimit në zonat e caktuara dhe kryerjes së detyrave të stërvitjes luftarake”, thuhet në deklaratë.
Departamenti i Mbrojtjes vuri në dukje se “qëllimi i inspektimit është të vlerësojë gatishmërinë dhe aftësinë e personelit për t’iu përgjigjur shpejt një situate të mundshme krize”.

Sipas deklaratës, “njësitë dhe nënnjësitë ushtarake do të operojnë në zona të panjohura në një mjedis që ndryshon me shpejtësi”.

Kërcënimi i sulmeve me raketa ndaj infrastrukturës ushtarake dhe civile të Ukrainës nga territori i Republikës së Bjellorusisë mbetet real, tha të mërkurën zëdhënësi i Ministrisë së Mbrojtjes të Ukrainës, Oleksandr Motuzyanyk.

“Forcat e Armatosura të Republikës së Bjellorusisë po forcojnë njësi të caktuara në kufirin bjelloruso-ukrainas në rajonet Brest dhe Gomel. Veprimet demonstrative dhe provokuese përgjatë kufirit shtetëror me Ukrainën nuk përjashtohen në të ardhmen,” shtoi ai.

Sipas tij, kërcënimi nga Bjellorusia nuk ka pushuar kurrë.

“Siç e dini, sot ushtria ruse po përdor territorin e Republikës së Bjellorusisë si trampolinë për sulmin ndaj Ukrainës. Në fakt, për shkak të kësaj, njësitë ruse mundën të shfaqen kaq shpejt në periferi të kryeqytetit.” theksoi Motuzyanyk.