KOSOVE-Zëvendëskryeministri i Kosovës, njëherësh shef i diplomacisë kosovare, Behgjet Pacolli ka deklaruar se pavarësia e vendit tonë është e lidhur me ruajtjen e ekzistencës së një populli që ishte larguar nga shtëpitë e tij gjatë regjimit të Sllobodan Milloshevicit dhe se situata me Kataloninë është krejt ndryshe.

Ai në një intervistë për Radio Bullgaria tha se Kosova ka mbrojtur të drejtën e saj universale për pavarësi edhe në Gjykatën ndërkombëtare në Hagë, e cila i njohu këtë të drejtë popullit të Kosovës.

“Ne kemi mbrojtur të drejtën tonë universale për pavarësi. Gjykata Ndërkombëtare ka vlerësuar dhe njohur gjithashtu të drejtën e popullit të Kosovës”, u shpreh Pacolli, transmeton KP.

Ai ka folur edhe për samitin në Sofje gjatë muajit maj “BE-Ballkani Perëndimor”.

Pacolli tha se të gjitha shtetet duhet të trajtohen në një mënyrë dhe shprehu shpresën se samiti do të kontribuojë për përparimin e Kosovës në integrimin e saj të plotë evropian.

“Bullgaria do të ndihmojë për arritjen e një dialogu të mirë me pesë vendet anëtare të Unionit, të cilat ende nuk e kanë njohur pavarësinë e saj – Spanja, Rumania, Qiproja, Greqia dhe Sllovakia, si dhe për zgjidhjen e problemeve mes Beogradit dhe Prishtinës”, ka thënë shefi i diplomacisë së Kosovës, duke i quajtur bisedimet midis Serbisë dhe Kosovës “ndoshta më të rëndësishmet e çdo presidence evropiane”.

(BalkanWeb)