TIRANE- Paketa e re fiskale për këtë vit nuk do të parashikojë ndryshime në vlerën e tatimit mbi vlerën e shtuar apo tatimin mbi të ardhurat, por do të ketë ndryshime në taksën e pasurisë së paluajtshme dhe ndryshim në taksën e hoteleve.

Gazeta “Panorama” zbardh ndryshimet e reja, ku mësohet se për herë të parë çdo pronar që disponon një tokë truall, pavarësisht përdorimit apo mospërdorimit të tij, do të paguajë taksë. Burime nga Ministria e Financave shpjeguan se ende nuk është përcaktuar niveli i kësaj takse. Ndërkohë, Financat po punojnë për krijimin e një baze të dhënash nga kadastrat fiskale, të cilat do të shërbejnë më pas që kjo taksë të mblidhet sipas çmimit të tregut të truallit.

Paketa e re fiskale do të sjellë ndryshime edhe për taksën e fjetjes në hotel. Kjo taksë do të jetë fikse 140 lekë/personi për net qëndrimi, nga 5 për qind e vlerës së faturës së fjetjes që lëshon hoteli, që është aktualisht.

TAKSA E TRUALLIT
Paketa e re fiskale për vitin 2016 do të sjellë që si taksë e pasurisë së paluajtshme, përveç ndërtesës dhe tokës bujqësore, të taksohet edhe toka “truall”. Çdo pronar, pavarësisht përdorimit ose mospërdorimit të truallit që disponon, do të paguajë taksë për të, të llogaritur si pasuri të paluajtshme. Deri tani taksoheshin si pasuri të paluajtshme vetëm ndërtesat dhe tokat bujqësore. Financat nuk kanë vendosur ende një tarifë për taksimin e trojeve, por mendohet se brenda vitit do të propozojnë një taksë, në bazë të vlerës së tregut për trojet. Aktualisht shumica e trojeve janë brenda qyteteve.

TAKSA E HOTELEVE
Ndryshimet e reja në politikat fiskale do të sjellin që taksa e fjetjes në hotel të jetë në vlerë fikse, pra në 140 lekë/personi për net qëndrimi. Ndërsa aktualisht ajo është 5 për qind e çmimit të fjetjes, sipas faturave që lëshonte hoteli për çmimin e fjetjes dhe mbi të shënohej vlera e taksës. Edhe kjo taksë mblidhet nga pushteti vendor. Financat pranojnë se ka një evazion me vlerën e faturave, dhe se vendosja e një tarife fikse do të ndihmojë në administrimin e kësaj takse.

KADASTRA FISKALE
Një tjetër taksë që do të ndryshojë është edhe ajo për shtëpitë. Aktualisht për shtëpitë paguhet 15 lekë/m2 në vit, për ato të ndërtuara para vitit 1993, dhe 30 lekë/m2 në vit për ato të ndërtuara pas këtij viti. Financat pranojnë se mbledhja e kësaj takse është në nivele shumë të ulëta. Përgjegjës për arkëtimet është pushteti vendor. Në relacionin e ndryshimit të kësaj takse, theksohet se aktualisht
deficiti vjetor nga taksa e ndërtesave arrin në 5 miliardë lekë, ose rreth 50 milionë USD. Por, duket se taksa do të ndryshojë me rritje. Ndër arsyet e dështimit të të ardhurave nga taksa e pasurisë renditet edhe “Niveli i ulët i taksës së pasurisë në krahasim me vendet e tjera, që lidhet kryesisht me metodologjinë e taksimit”. Pra, pritet që të ndryshojë skema e llogaritjes së taksës. Një ndër variantet që po diskutohet është pagesa në bazë të vlerës fiskale të apartamentit. Kështu, një apartament në qendër të qytetit do të ketë një taksë më të lartë se një apartament në periferi. Apo një shtëpi në Tiranë do të paguajë më shumë se një shtëpi në qytetet e tjera. Financat pranojnë se janë akoma duke punuar për ngritjen e kadastrës fiskle që do të përcaktojë vlerën e çdo sipërfaqeje të banueshme apo shfrytëzueshme në Shqipëri.
(ma.ar/BalkanWeb)