BEOGRAD

Në Beograd është hapur sot panairi i verërave dhe pijeve shqiptare, një nga projektet e “Open Balkan”.

Kryeministri Edi Rama ka publikuar video nga vizita në stendat e pijeve në panair i shoqëruar nga presidenti serb Aleksandar Vuçiç dhe kryeministri i Malit të Zi Dritan Abazoviç.

Vuçiç nuk ka ngurruar të provojë konjakun e njohur “Skënderbeu” dhe nuk i ka kursyer lavdet.

“Besoj se do gjeni treg të mirë për produktin tuaj në këtë vend. Jeni shkumë konkurrues”, tha Vuçiç.
Ndërkohë Rama është pyetur nga një gazetar shqiptar i Maqedonisë nëse do të jenë më të bashkuar pas verës, sikurse tha Vuçiç në fjalim se vera i bashkon njerëzit. Kryeministri shqiptar tha se është mirë të pish me kujdes se pastaj mund të bashkohesh, por bën sherr.
“Vera është një gjë, e pira e verës është një gjë tjetër. Nuk është e thënë që të pish shumë që të bashkohesh. Më mirë është që ta prodhosh, ta provosh dhe të pish me kujdes se pastaj bashkohesh, por bën sherr”, tha Rama.