Vivek Yeshwant Ranadive është emri i radhët që lidhet me klubin kuqezi, nuk bëhet fjalë për një mbrojtës apo mesfushorë, por një bos indian i gatshëm të investojë së bashku me RedBird te Milan. Garry Cardinale, në javët e fundit, ka kërkuar në SHBA për investitorë të gatshëm të bashkohet me të në këtë aventurë të re në krye të Milan dhe sipas mediave italiane, miliarderi indian i është përgjigjur pozitivisht thirrjes së Cardinale.

Ranadive nuk është një emër i panjohur në fushën e sportit pasi është pronar i klubit të Sacramento Kings në NBA dhe gjithashtu ishte një nga personat që kërkoi të blinte aksionet e Chelsea. Shifrat e këtij investimi nuk bëhen publike por është e njohur që Garry Cardinale kërkon 1,2 miliardë euro për të paguar Elliott në fund të shtatorit, shifër që duhet për të mbyllur përfundimisht shitjen e “djallit”.

Nëse kjo marrëveshje mbyllet shpejt, kjo do të thotë se Maldini dhe Massara do të kenë në dispozicion një buxhet të majmë për të investuar në tregun e transferimeve.
(BalkanWeb)