TIRANË- Policia parandalon një vrasje me minë me telekomandë në Tiranë dhe arreston personin që po përgatiste bombën artizanale si dhe të fejuarën e tij.
“Më datë 04.08.2015, nga Strukturat e Krimeve të Rënda në Drejtorinë e Policisë Qarkut Tiranë, në kuadër të operacionit të koduar “Emigranti”, u parandalua një ngjarje e mundshme krimininale duke arrestuar në flagrancë shtetasit: Juljan Shorja, 29 vjec, lindur në Durrës dhe banues në Tiranë, i dënuar më parë për vjedhje dhe Rivi Toma, 26 vjeçe, lindur dhe banuese në Tiranë”- thuhet në njoftimin e policisë.
Arrestimi i shtetasit Juljan Shorja, u krye pasi nga veprimet hetimore rezultoi se ky shtetas po përgatiste një lëndë plasëse “Minë me telekomandë” për llogari të shtetasit Sh.P, ku ky i fundit, në bashkëpunim me shtetasin M.A do e përdornin për eleminimin e një personi.
Policia thotë se këta shtetas janë shpallur në kërkim. Po sipas të njejtave burime edhe personi që do eleminonin ata, ishte në kërkim nga policia.
Nga kontrolli i banesës së shtetasit Juljan Shorja u gjetën dhe sekuestruan në cilësinë e provës materiale, 2 kapsolla detonatore, municione luftarake dhe lëndë narkotike e dyshuar Cannabis Sativa. Për shkak të hetimit nuk jepen detaje të tjera të operacionit.
Arrsetimi i shtetases R.T (e fejuara e Juljan Shorja¬s) u bë pasi gjatë kontrollit në banesën e saj u gjetën dhe u sekuestruan bimë narkotike e dyshuar si “Cannabis Sattiva” e mbjellë në vazo brenda banesës së saj.
(ma.ar/BalkanWeb)