Katari dhe Shtetet e Bashkuara nënshkruan këtë fundjave një marrëveshje, sipas së cilës, Doha do të përfaqësojë dhe mbrojë interesat diplomatike amerikane në Afganistan. Ministrat e Jashtëm të të dy vendeve konfirmuan nga Uashingtoni partneritetin mes tyre rreth çështjeve rajonale.

Gjatë konferencës së përbashkët për shtyp, Sekrerari Amerikan i Shtetit Antony Blinken tha se: “Partneriteti ynë me Katarin është imperativ në lidhje me çështjet rajonale” dhe theksoi se ky partneritet është i gjerë dhe reflektohet në një dialog konstruktiv për shumë çështje në rajon.

Blinken shtoi se vendi i tij është në proces të krijimit të një njësie brenda Ambasadës së Katarit në Afganistan për të ofruar shërbimet konsullore të SHBA.
Sekretari amerikan i Shtetit afirmoi se marrëdhëniet me Katarin janë duke u zgjeruar dhe se ngjarjet në Afganistan kanë forcuar më tej partneritetin mes dy vendeve, teksa falënderoi Lartësinë e Tij Emirin e Katarit për kontributin e tij në këtë drejtim.

Blinken përmendi edhe përgatitjet që po bëjnë të dy vendet për të festuar 50-vjetorin e marrëdhënieve diplomatike dypalëshe, të cilat kanë arritur tashmë nivelin e tyre më të thellë në histori.

Ndërkohë, Sekretari Amerikan i Shtetit tha se vendi i tij është i shqetësuar nga lëvizjet e forcave ruse në kufirin ukrainas dhe nga qëllimet e panjohura të Rusisë. Ai theksoi se SHBA po shqyrton edhe mjetet e duhura për tiu kundërvënë përdorimit të emigracionit si mjet (presioni) politik.

Në lidhje me çështjen siriane, Blinken nënvizoi se: “Jemi të shqetësuar për sinjalet e dërguara nga vizita e Ministrit të Jashtëm të Emirateve të Bashkuara Arabe në Damask. Iu kujtojmë partnerëve tanë krimet e kryera nga regjimi sirian. Ne nuk e mbështesim normalizimin me qeverinë siriane”.

Ndërsa për zhvillimet në Etiopi, Sekretari Amerikan i Shtetit shprehu shqetësimin për mundësinë e shpërthimit të situatës së brendshme. “Jemi duke punuar për të mbështetur përpjekjet ndërmjetësuese midis palëve atje”, tha ai.

Nga ana e tij, Ministri i Jashtëm i Katarit tha se viti 2022 do të jetë i jashtëzakonshëm sa i përket ringjalljes së piketave të marrëdhënieve SHBA – Katar. “Marrëdhëniet tona u bënë më të ngushta kur punuam me Uashingtonin dhe partnerët ndërkombëtarë për të evakuuar mijëra njerëz nga Kabuli” – vuri në dukje ai.
Sheikh Mohammed bin Abdul Rahman Al Thani siguroi se Katari mbetet i përkushtuar të ndërmarrë veprimet e nevojshme për të garantimin e stabilitetit në Afganistan. Ai theksoi se prioritet është që ndihmat ndërkombëtare të arrijnë tek populli afgan, sidomos tani me afrimin e dimrit.

Sheikh Al Thani gjithashtu u bëri thirrje talebanëve të përmbushin detyrimet e tyre, ndërsa i kërkoi komunitetit ndërkombëtar të vazhdojë të angazhohet në Afganistan dhe të mos e braktisë atë. “Braktisja e Afganistanit do të ishte gabim. Izolimi i vendit nuk do të sjellë asnjë zgjidhje atje” – nënvizoi ai.
Sa i përket zhvillimeve rajonale, Ministri i Jashtëm i Katarit u shpreh se: “Ndjekim me shqetësim përshkallëzimin në Etiopi dhe paqëndrueshmërinë në Afrikën Lindore”.
Rreth çështjes siriane, Sheikh Muhamed bin Abdul Rahman Al Thani siguroi se: “Aktualisht nuk e mendojmë normalizimin e marrëdhënieve me regjimin e Asadit. Ne besojmë se ai duhet të mbajë përgjegjësi për krimet e tij”.

Nga ana tjetër, Ministri katarian tha se “Irani është fqinji ynë dhe marrëdhënia me të nuk është pengesë në rrugën e marrëdhënieve tona me Shtetet e Bashkuara. Ne nuk pajtohemi me shumë prej politikave iraniane, por kjo nuk do të thotë se nuk duhet të flasim me ta”.
Gjithashtu, Sheikh Mohammed bin Abdul Rahman Al Thani vuri në pah rolin udhëheqës që po luan Katari për plotësimin e nevojave të botës për energji.
Më pas, Ministrat e Jashtëm të të dy vendeve nënshkruan marrëveshje sipas së cilës, Katari do të përfaqësojë dhe mbrojë interesat diplomatike amerikane në Afganistan.

Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb