TIRANË- Partia Demokratike vijon të akuzojë kreun e Bashkisë së Tiranës, Erion Veliaj se do të shtojë taksat për qytetarët të Tiranës. I pari që artikuloi akuzat ndaj Veliajt në këtë drejtim ishte ish-kryeministri Berisha, ndërsa pas tij këshilltarët e djathtë në Këshillin Bashkiak të Tiranës shpjeguan se ku konsistojnë ndryshimet e taksave.

Anëtari i djathtë i Këshillit Bashkiak, Mateo Spaho tha se “me një muaj vonesë në raport me limitet ligjore, në mungesë totale transparence, Erion Veliaj prezanton rrëmbimthi për të aprovuar në datën 30 dhjetor një dokument që ai e quan Buxhet për qytetin e Tiranës, bashkë me 9 projekt-vendime të tjera”.

“Deri më sot, dokumenti i buxhetit është mbajtur në fshehtësi të plotë dhe në 4 ditë kohë tentohet që të aprovohet me forcën e kartonëve por jo me forcën e arsyes. Kemi dëgjuar vetëm deklarata mediatike, siç është bërë tashmë normale nga institucioni i Bashkisë dhe asnjë përmbajtje. Projekt buxheti nuk është konsultuar me asnjë grup interesi, qofshin këta qytetar të Tiranës, pronar të biznesit të vogël, fermerë, biznesmen të mëdhenj, operator turistikë apo profesionistë të lirë”, tha Spaho.

Sipas tij, pas dy vitesh të vazhdueshme, rritjesh taksa nga qeveria qendrore dhe rritje çmimi nafte dhe energjie ‘tani po shfaqet fytyra e vërtet e taksidarit Erion Veliaj, ndjekës i denjë i idealeve të Edi Ramës’.

Spaho deklaroi se qytetarët e Tiranës me këtë projektbuxhet do të kenë surprizë për Vitin e Ri 50 milionë dollarë taksa shtesë për vitin e ri.

“Por nga do merren këto para? Një pjesë e mirë do të merret nga fshatarët e thjeshtë dhe fermerët të cilët janë në një gjendje ekonomike të vështirë e tashmë do të jenë të dëshpëruar, pasi për çdo hektar tokë bujqësore do paguajnë 200.000 lekë taksë shtesë.

Këto para do të vijnë nga biznesi i madh, i cili për një magazinë 2.000 m2 do të paguajë 3.200.000 lekë taksë prone shtesë”, tha ai.

Këshilltari demokrat deklaroi se këto masa do godasin xhepat e qytetarëve që kërkojnë të blejnë një apartament për të krijuar familje, pasi taksa për çdo metër katror ndërtesë do kalojë nga 10 euro në 50 euro dhe blerja e një shtëpie prej 100m2 do të thotë ti japësh 4.000 euro taksë shtesë për Bashkinë e Erion Veliajt!

“Biznesit do t’i kërkohet veç këtyre taksave t’i japi deri në 370.000 lekë në vit për mirëmbajtjen e shkollave fillore të cilat Bashkia duhet ti mirëmbante vet. Qytetarët do të duhet të paguajnë 120.000 lekë në muaj ose 4000 lekë në ditë nëse duan të parkojnë makinën e tyre në vendet ku do të vendos Bashkia.  Në një vend si Shqipëria, Tirana është qyteti ku banojnë 30% të shqiptarëve dhe prodhohet 40% e Prodhimit të Brendshëm Bruto. Me këtë goditje të dyfishtë Rama dhe Veliaj po shkatërrojnë mundësinë e Shqipërisë dhe të Tiranës për t’u zhvilluar”, deklaroi Spaho.

Më tej ai tha se nuk do të ketë asnjë vendim për zhvillim ekonomik të qytetit, asnjë vendim për politika fiskale në ndihmë të biznesit, asnjë vendim në ndihmë të qytetarëve, por vendime që lidhen ose me marrje pronash e ndarje favoresh ose taksa shtesë.

“9 vendime po tenton të kalojë fshehurazi një natë para ndërrimit të viteve, po aq sa ka kaluar në këto 6 muaj në punë. Mbas dy muajsh pa e thirrur Këshillin Bashkiak të Tiranës, mbledhja më e rëndësishme e vitit, ku taksat rriten 50 milionë dollarë, duan ta kalojnë në nxitim e sipër, Po jo vetëm kaq por duan qe asetet publike ti vënë në shërbim të klientëve dhe miqve të tyre ! Këshilltarët e Partisë Demokratike do të denoncojnë pikë për pikë aferat korruptive të Ramës dhe Veliajt dhe bashkë me qytetarët ne do t’u bëjmë rezistence deri në pamundësimin e zbatimit të tyre”, përfundoi Spaho.

[embeddoc url=”https://www.balkanweb.com/site/wp-content/uploads/2015/12/Buxheti-i-Bashkise.pptx” viewer=”microsoft”]

(m.k/BalkanWeb)

Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb