Shoqëria civile ka protestuar sot në Prishtinë kundër dhunimit të 11-vjeçares nga pesë persona – kjo me qëllim që të kërkohet drejtësi në mënyrë që dhunuesit ta marrin ndëshkimin e merituar.

Protesta për të kërkuar drejtësi për rastin e dhunimit të 11-vjeçares ka vazhduar edhe para Ministrisë së Drejtësisë, përpos nëpër shesheve të Prishtinës.

Në Ministrinë e Drejtësisë është hedhur ngjyrë e kuqe, si shenjë proteste.

https://www.facebook.com/kultpluscom/videos/452579210132559/

Protesta organizohet nga Kolektivi për Mendim dhe Veprim Feminist dhe ka nisur në Sheshin “Zahir Pajaziti”.

Disa ditë më parë një 11-vjeçare u dhunua në Prishtinë nga pesë persona. Policia e Kosovës ka arritur t’i arrestojë të pesë të dyshuarit, ndërkaq ndaj katër prej tyre është shqiptuar masa e paraburgimit prej 30 ditësh.
Nga pesë të arrestuarit tre janë të mitur.

Nën brohorima “Viktima nuk ka faj”, “mbrojtje për viktimat” “Qysh s’po ju vjen marre”, “Burgim të përjetshëm” protestuesit pasi kanë gjuajtur me ngjyrë të kuqe Ministrinë e Drejtësisë dhe Prokurorinë e Shtetit, të njëjtën gjë e kanë bërë edhe në ndërtesën e Këshillit Gjyqësor të Kosovës.

Të martën është mbajtur edhe një tjetër protestë, po me qëllimin e njëjtë.

Si rrjedh e kësaj ngjarje, të martën ka dhënë dorëheqje drejtori i Policisë së Kosovës, Samedin Mehmeti.

E ka cilësuar “akt moral”, dorëheqja është pranuar nga kryeministri Albin Kurti, i cili të hënën po ashtu e ka dënuar ashpër dhunimin e 11 vjeçares.

Njësoj, edhe politikanë tjerë të pushtetit, më pas aktorë të shoqërisë civile, akademisë e gazetarisë, si dhe qytetarë kishin reagime nëpër rrjete sociale për ta kundërshtuar dhunën ndaj grave dhe fëmijëve