Periudha e tranzicionit në Siri mund të zgjasë nga tre deri në pesë vjet, me shumicën e pushtetit të përqendruar në duart e presidentit të vendit, sipas një draft deklarate kushtetuese të paraqitur nga Al Jazeera.

Burimet tregojnë se drafti përshkruan Sirinë si një republikë presidenciale.

Deklarata specifikon se legjislacioni i vendit do të jetë i rrënjosur në parimet e ligjit islamik. Për më tepër, ai thekson se përgjegjësia kryesore e ushtrisë kombëtare do të jetë “të mbrojë atdheun dhe qytetarët sirianë duke ruajtur paqen civile”.

Mbajtja e armëve do të kufizohet ekskluzivisht për përfaqësuesit e institucioneve shtetërore.

Siç vërehet nga kanali televiziv, projekt-deklarata kushtetuese bazohet në versionet e mëparshme të kushtetutës së Sirisë, veçanërisht nga parimet themelore të Ligjit Bazë të vitit 1950.

Një ditë më parë, komiteti kushtetues i krijuar nga qeveria kalimtare e Sirisë finalizoi projektdeklaratën kushtetuese. Sipas Al Jazeera, ky dokument iu paraqit kreut të administratës së re siriane, Ahmed al-Sharaa, më 12 mars.

(A.A/BalkanWeb)