TIRANË- Ngjarja e natës së të shtunës e ndodhur në një disko në Dhërmi kur pati përplasje me armë por fatmirësisht pa viktima ishte lajmi i fundjavës.
Një i ri nga Tirana u arrestua pas ngjarjes nga policia, ndërsa u tha se ai kishte qëlluar në ajër 4 herë me armën e zjarrit që e mbante pa leje pasi ishte përballur me persona me të cilët kishte një konflikt të vjetër.
Ngjarja shkaktoi tronditje të madhe tek pushuesit e pranishëm të cilët sipas dëshmitarëve në përpjekje për të shpëtuar janë gjakosur gjatë daljes nga lokali. Madje në disko pati edhe turistë.
Por kjo ngjarje mund të ishte parandaluar. Kështu thotë ish-kështilltari juridik i Ministrisë së Brendshme (në kohën e ish-ministrit Saimir Tahiri) Erlis Hereni.
Në një analizë të publikuar sot, Hereni thotë se nëse do të zbatohej “Ligji për masat shtesë të sigurisë publike” i miratuar që në 2016, ngjarja mund të ishte parandaluar.
Disa nga pikat që parashikon ligji janë përdorimi i pajisjeve elektronike të teknologjisë së lartë për identifikimin, në funksion të sigurisë si detektorë, ura kontrolli, reader, GPS etj.); apo punonjës sigurie për çdo 25 metër katrorë hapësirë.
Hereni thotë se atë natë nuk rrezikuan vetëm ata që ishin aty për të festuar pushimet por u lebetitën dallëndyshet guximtare nga Evropa e më gjerë, që vijnë si turistë në Shqipëri.
STATUSI I HERENIT
“HAVANA Beach”, casus belli i zbatimit të ligjit “Për masat shtesë të sigurisë publike”!
Krismat në “HAVANA Beach” ishin shkundja e radhës (pas tërmeteve) në këtë verë tropikale që po kalojmë, here të nxehtë si shkretëtira e herë të ftohtë si acari.
Jo se në Shqipëri nuk kanë ndodhur ngjarje edhe më të rënda, por sepse “krismat në Havana” nuk rrezikuan thjesht dhe vetëm jetën e atyre që qëlluan aty për të festuar pushimet e shumë pritura; ato lebetitën dallëndyshet guximtare nga Evropa e më gjerë, që vijnë si turistë në Shqipërinë që ndoshta e njohin përmes filmit “Taken”.
E siç e do zakoni, sa herë ndodh diçka që i brendashkruhet sferës së sigurisë publike, gishti i përgjegjësisë drejtohet ekskluzivisht tek Policia e Shtetit, duke anashkaluar tërësisht përgjegjësinë që ka secili qytetar (pa diskutim institucion) i republikës për ta bërë këtë vend më të sigurt.
Nuk më shkon kurrsesi ndër mend të shfajësoj policinë kur nuk performon por njëherazi e kam të pamundur të bëj sehir teksa përgjegjësia që duhet të bashkëndajmë të gjithë tretet mes analizash, komentesh gjitholloge apo denoncimesh digjitale plot fantazi.
Nuk është i largët shtatori i vitit 2016, ku pas shumë takimesh e konsultash, mes shumë debatesh institucionale e politike, u miratua “Ligji për masat shtesë të sigurisë publike”. Madje, ndryshe nga sa kemi parë të ndodhë, u miratuan në kohë edhe aktet nënligjore që e bëjnë atë të zbatueshëm.
Kjo do të thotë se ky ligj dhe dispozitat e tij, të marra seriozisht nga institucionet në radhë të parë, bizneset e qytetarët më pas, mund të kishte parandaluar terrorin e përjetuar nga pushuesit e Dhërmiut.
Sipas përcaktimeve të këtij ligji dhe udhëzimeve në zbatim të tij, përshkruhen masat shtesë që duhet të merren që nga agjencitë e transportit të udhëtarëve apo mallrave me rrezikshmëri të lartë, tek njësitë e këmbimit valutor, baret restorantet apo lokalet e natës, e deri tek rezidencat apo pallatet; ku për subjektet që operojnë nga ora 23:00 deri në orën 06:00 përcaktohet shprehimisht detyrimi për të vënë në zbatim këto masa:
1. Përdorimi i sistemit të kamerave ÇTV, me rezolucion të lartë, me rreze infra të kuqe, që ruajnë imazhet filmike në NRV/Server deri në 2 muaj;
2. Instalimi i sistemeve me kamera për leximin automatik të targave në parkingjet e këtyre njësive të biznesit dhe ruajtjen e imazheve filmike në NRV/Server deri në 2 muaj;
3. Përdorimi i pajisjeve elektronike të teknologjisë së lartë për identifikimin, në funksion të sigurisë (detektorë, ura kontrolli, reader, GPS etj.);
4. Kontraktimi i shoqërive private të sigurisë fizike ku, përveç punonjësve në hyrje, duhet të ketë patjetër dhe një punonjës për çdo 40-50 konsumatorë apo për çdo 25 metra katrorë hapësirë.
Personalisht nuk isha aty atë mbrëmje, e atë që ndodhi e pashë në njoftimet e mediave. Por kushdo që ishte e ka të lehtë të gjykojë thjesht e vetëm duke i hedhur një sy të shpejtë listës sa më sipër.
Udhëzimi që detajon këto detyrime në zbatim të ligjit mban datën 10 mars 2017. Afati që kanë pasur bizneset për t’i përmbushur këto detyrime në emër të sigurisë së të gjithëve ka qenë 28 dhjetori 2017.
E që prej kësaj datë neni 15 i ligjit ngarkon me përgjegjësi Policinë e Shtetit për të kryer Inspektimet e periodike për monitorimin e përmbushjes së masave shtesë të sigurisë, sipas përcaktimeve në udhëzimin përkatës të ministrit përgjegjës për rendin dhe sigurinë publike.
Telajo e kësaj ngjarje flet qartë. Por se kujt i duhet tërhequr veshi ca më shumë, policisë, bizneseve, apo papërgjegjshmërisë tonë kolektive lidhur me atë çka në të vërtetë përbën arsye për shqetësim kolektiv, këtë nuk e them dot unë. A po, një gjë di ta them me siguri, nëse do të ishte zbatuar ligji, gjasat që kjo ngjarje (që për fat nuk pati viktima) të mos ndodhte janë të qenësishme.
(m.k/BalkanWeb)
