Gazetari i famshëm holandez Peter R. de Vries, i njohur për raportimet e tij në botën e krimit, po lufton për jetën e tij, pasi u qëllua në një rrugë të Amsterdamit.

Autoritetet holandeze njoftuan se janë arrestuar tre të dyshuar, përfshirë edhe autorin e mundshëm, por nuk dhanë hollësi të tjera për ngjarjen.

“Ai u plagos rëndë dhe po lufton për jetën e tij”, tha kryetarja e bashkisë së Amsterdamit, Femke Halsema në një konferencë me gazetarët. “Ai është një hero kombëtar për të gjithë ne. Një gazetar i rrallë, i guximshëm, që pa u lodhur kërkoi drejtësi”.

Gazetari De Vries fitoi çmimin ndërkombëtar Emmy në vitin 2008 për punën e tij në hetimin e zhdukjes së adoleshentes amerikane Natalee Holloway në Aruba, në vitin 2005.