Ka mbetur i plagosur me armë zjarri mesditën e sotme djali i biznesmenit të njohur në Pogradec, pronarit të Hotel Voloreka. BalkanWeb mëson se Joan Muçllari ka shkuar vetë në spital për të marrë ndihmë mjekësore.

Ai ka deklaruar para bluzave të bardha se e kishin qëlluar me armë dy persona. Menjëherë më pas është njoftuar policia.

NJOFTIMI I POLICISË

Plagosën me armë zjarri gjatë një konflikti të çastit një shtetas, identifikohen dhe shpallen në kërkim dy autorët e dyshuar të ngjarjes.

Më datë 25.04.2022, rreth orës 16:00, në Spitalin e Pogradecit është paraqitur për mjekim, jashtë rrezikut për jetën, i dëmtuar në këmbë shtetasi J. M., i cili dyshohet të jetë plagosur në lagjen “Voloreka”, me armë zjarri tip pistoletë, gjatë një konflikti të çastit, nga dy shtetas të tjerë.

Menjëherë në vendngjarje, kanë shkuar shërbimet e policisë dhe nga veprimet e para u bë e mundur identifikimi i dy autorëve të dyshuar konkretisht shtetasit F. B. dhe G. M.

Nga ana e Policisë janë ngritur pika kontrolli dhe po punohet për kapjen e tyre dhe sqarimin e rrethanave të ngjarjes.