Paul Pogba vazhdon të jetë një nga emrat më të përfolur në tregun e transferimeve. Nuk është sekret që mesfushori kërkon të largohet nga Manchester United, por mediat angleze bëjnë të ditur se ai ka rritur presionin për ta mundësuar këtë që në merkaton e janarit.
Francezi ia ka bërë të qartë klubit, trajnerit dhe shokëve të skuadrës që nuk do të qëndrojë në Premier League dhe sipas tij ka bërë gati valixhet për destinacionin e ardhshëm, që me shumë mundësi është Madridi. Pogba ndiqet prej kohësh nga Real, ndërsa qëndron në krye të listës së dëshirave të Zinedine Zidane. Menaxheri i tij, Mino Raiola po punon në fshehtësi për të gjetur mënyrën më të mirë për të bindur Manchester United të shesë futbollistin, por deri tani “Djajtë e Kuq” kanë rezistuar në kërkesën e tyre financiare.
Më thelb, Manchester United nuk ka qenë asnjëherë kundër largimit të Pogba, por pretendon për kartonin e tij jo më pak se 125 milion euro. Kjo shifër është e përballueshme për “los blancos”, por problemi qëndron te ekuilibrat që duhet të ruhen në dhomat e zhveshjes. Florentino Perez dhe bashkëpunëtorët e tij i druhen faktit se transferimi Pogba me statusin e blerjes më të shtrenjtë do të prishte atmosferën brenda ekipit, që ka gjetur qetësinë pas një nisje të vështirë të sezonit.
(balkanweb)