Presidenti i përkohshëm i Sirisë, Ahmad al-Sarrah, do të vizitojë nesër Ankaranë, në udhëtimin e tij të dytë zyrtar jashtë vendit pas Arabisë Saudite, njoftoi presidenca turke. “Presidenti i përkohshëm i Republikës Arabe Siriane, Ahmad al-Sarrah, do të bëjë një vizitë në Ankara të martën, më 4 shkurt, me ftesë të Presidentit tonë Recep Tayyip Erdogan,” i tha X-së Drejtori i Komunikimit të Presidencës Turke Fahrettin Altun.
“Masat e përbashkëta që duhet të marrin dy vendet tona për rimëkëmbjen ekonomike, stabilitetin dhe sigurinë e qëndrueshme (në Siri) do të vlerësohen gjatë takimit që do të mbahet në pallatin presidencial”, thuhet në njoftimin e presidencës turke.
Turqia, e cila ndan një kufi 910 kilometra me Sirinë, ka pritur rreth tre milionë refugjatë sirianë. Rreth 80,000 prej tyre janë kthyer në Siri që nga rënia e regjimit të Bashar al-Asad.
Turqia mbështet udhëheqjen e re siriane dhe deklaron gatishmërinë e saj për të marrë pjesë në rindërtimin e vendit. Ajo gjithashtu kërkon bashkëpunim me udhëheqjen e re në Damask për çështjen e forcave kurde që kontrollojnë një zonë të madhe në Sirinë verilindore.
Nga Riadi dje, lideri sirian përshëndeti “vullnetin e vërtetë të Arabisë Saudite për të mbështetur Sirinë në ndërtimin e së ardhmes së saj”, foli për një “partneritet të vërtetë” dhe sqaroi se gjatë takimit të tij me Princin e Kurorës Mohammed bin Salman ata diskutuan “programe të mëdha të së ardhmes në fushat e energjisë, teknologjisë, arsimit dhe shëndetësisë”.
Udhëheqja e re në Damask po mbështetet te vendet e pasura të Gjirit për të financuar rindërtimin e vendit dhe rimëkëmbjen e ekonomisë së tij pas 14 vitesh lufte dhe sanksionesh ndërkombëtare.
Vizita e Ahmad al-Sarra në Riad shënon gjithashtu distancimin e Sirisë nga Irani dhe dobësimin e pozicionit të Teheranit në rajonin e Lindjes së Mesme.
