Presidenti i Iranit, Hassan Rohani, ka thënë se sanksionet amerikane i kanë kushtuar vendit të tij hiç më pak se 200 miliardë dollarë në investime dhe të hyra të jashtme gjatë dy vjetëve të fundit.

Kreu i republikës islamike i bëri këto komente gjatë nisjes së një projekti hekurudhor afër Tehranit. “Irani do t’i kishte fituar 200 miliardë dollarë të ardhura, nëse vendi nuk do të ishte i përfshirë në luftën ekonomike”, tha ai.

Shtetet e Bashkuara i vendosën sanksione të reja Iranit pas tërheqjes nga marrëveshja bërthamore e vitit 2015 mes Iranit dhe fuqive botërore.

Që nga largimi i Shteteve të Bashkuara nga marrëveshja vitin e kaluar, eksporti i naftës iraniane në botë ka rënë për 90 për qind, valuta kombëtare ka shënuar humbje të vlerës, ndërsa inflacioni ka shkuar në mbi 40 për qind.

Komentet e presidentit iranian erdhën vetëm disa javë pasi miliona banorë të këtij shteti protestuan kundër vështirësive ekonomike, pabarazisë, korrupsionit, diskriminimit dhe rritjes së çmimit të naftës, shkruan “Free Europe”.

Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb