NGA ERION SKENDAJ
TIRANE– Çfarë mund të bëjë më shumë një prind tek sheh si vuan fëmija i tij i sëmurë me tumor në gjak? Ndërsa ai vetë është i varfër, aq i varfër e i zhytur në borxhe sa s’mundet t’i blejë në farmaci kurat deri në 750 euro që spitali nuk i disponon.
Në pediatrinë e QSUT ka me qindra baballarë dhe nëna që e vuajnë në lëkurë këtë brengë therëse që hera-herës duket sikur merr zgjidhje, porse në fund gjithçka ngjan si një premtim bosh. Mariana nga Vlora është një nga ato gjyshe që ka braktisur gjithçka në jetë për t’iu ndodhur pranë nipit të vogël, Serxhos, që lëngon prej 9-muajsh në shtrat i prekur nga një formë e rëndë e leucemisë akute.
Me lotët që përpiqet t’ia fshehë kamerës, gruaja në moshë që shtrëngon fort në krahë nipin e sëmurë tregon me dhimbje se nuk ka më para për të blerë në farmaci ilaçet e kimios, duke specifikuar medikamentin kryesor Asparaginaze.
Gjyshja e vogëlushit 2-vjeçar nuk harron të falënderojë mjekët e Pediatrisë për përkushtimin që tregojnë në punë, por thotë se kjo nuk mjafton për t’i shpëtuar foshnjën që duhet të kishte kryer dozën e fundit të kimios 2 javë më parë.
Serxhio nuk është i vetmi fëmijë që ka mbetur pa kurën e kimios pasi medikamenti kryesor “Asparaginaze” mungon në të gjithë shërbimin e Onko-Hematologjisë në QSUT. Në tregun e hapur ilaçi kushton afër 750 euro paketa dhe nuk shitet i ndarë në doza.
Në shenjë indinjate prindërit e fëmijëve me leucemi protestuan gjatë paradites para shërbimit pediatrik në QSUT, protestë kjo që është mbështetur nga shoqëria civile.
Nga QSUT apo Ministria e Shëndetësisë nuk ka një reagim zyrtar, por burime nga spitali më i madh në vend pranojnë situatën e vështirë të krijuar për mungesë të shumë medikamenteve citostatikë.
(el.sp/BalkanWeb)
