GREQI– Refugjatët dhe migrantët në Greqi, marrin pak ose fare shërbime mjekësore, ka thënë grupi i ndihmës Doktorët e Botës.
Rreth 60 mijë migrantë dhe refugjatë po qëndrojnë në Greqi, kryesisht në kampet e mbipopulluara, të cilat nuk kanë kushte higjienike. Më shumë se gjysma e 20 mijë migrantëve që arritën sivjet në Greqi janë gra dhe fëmijë, thuhet në të dhënat e OKB-së.
Ky grup, pas intervistimit të migrantëve në Greqi, ka zbuluar se 72 për qind e problemeve shëndetësore me të cilat përballen migrantët, janë trajtuar në mënyrë “joadekuate” ose nuk janë trajtuar fare.
Grupi Doktorët e Botës ka mësuar se gratë shpesh nuk kërkojnë fare përkujdesje shëndetësore, pasi nuk janë në dijeni për të drejtat e tyre. Ato, madje nuk e kuptojnë sistemin e përkujdesit shëndetësor, ose kanë frikë se nëse kërkojnë ndihmë mjekësore mund të arrestohen.
Azilkërkuesit në Greqi kanë qasje në spitale dhe kujdes shëndetësor, por sistemi i shëndetit publik, i cili është goditur për shkak të krizës ekonomike, po përpiqet që të përballojë fluksin e pacientëve.
(BalkanWeb)
