TIRANE– Prokuroria e Apelit në Tiranë ka dërguar për rekurs dosjen Gjika, duke kërkuar nga Gjykata e Lartë prishjen e vendimit të Apelit për kryetarin e Bashkisë së Vlorës. Kjo gjykatë la në fuqi vendimin e Gjykatës së Shkallës së Parë për pafajësinë e kryetarit të Bashkisë së Vlorës, Shpëtim Gjika dhe ish-drejtoreshës Urbanistike, Eleni Dardhaj dhe rikthimin e çështjes për rishqyrtim nga një tjetër trup gjykuese në Gjykatën e Apelit.

Shpëtim Gjika akuzohet për shpërdorim detyre dhe falsifikim dokumentesh, dhe nisur nga kjo Prokuroria në rekursin e paraqitur para Gjykatës së Lartë, vlerëson se “vendimi gjyqësor i Gjykatës së Apelit është tërësisht i pabazuar, me shkelje dhe zbatim te gabuar të ligjit material penal”.

“Prokuroria e Apelit, e cila i qëndron pretendimit se shtetasit Gjika dhe Dardhaj kanë konsumuar elementët e veprës penale të “shpërdorimit të detyrës” dhe “falsifikimit të dokumenteve zyrtarë” dhe për këtë duhen shpallur fajtorë, shpreh kundërshtimin lidhur me vendimin e pafajësisë së Gjykatës së Apelit, duke u bazuar në 3 çështje kryesore procedurale, të cilat i ka analizuar në rekursin e saj:

1. Gjykata e Apelit në keqzbatim të ligjit procedural penal, konkretisht nenet 129 të K.Pr.P dhe 354/3 të K.Pr.P nuk disponoi me vendim mbi kërkesat paraprake të parashtruara nga Prokuroria e Apelit Tiranë, duke sjelle për pasojë cenim flagrant të së drejtës së palës në proces për të patur një vendimmarrje në procesin gjyqësor ku merr pjesë, duke zhvilluar një proces gjyqësor, i cili deri në përfundim të tij edhe me marrjen e vendimit përfundimtar, nuk ka dhënë argumente për kërkesën e ngritur, duke e bërë kështu procesin në Apel një proces të pavlefshëm në vetvete.

2. Nga ana e Gjykatës së Shkallës së Parë, por në vijim, pa asnjë ndryshim edhe nga Gjykata e Apelit, disponohet me një vendim përfundimtar, pa konkluduar mbi ndërtimin e faktit të rezultuar nga procesi i shqyrtimit gjyqësor, në kundërshtim kjo me nenin 383 të K.Pr.P. Gjithashtu konstatohet nga te dy gjykatat se nuk janë çmuar aspak prova të rëndësishme të kërkuara nga Prokuroria dhe të administruara gjatë shqyrtimit gjyqësor, në kundërshtim kjo me parashikimet e nenit 129, 152 dhe 380 të K.Pr.P.

3. Vendimi gjyqësor i Gjykatës së Apelit është tërësisht i pabazuar, me shkelje dhe zbatim të gabuar të ligjit material penal, konkretisht nenit 186 të K.P”, thuhet në njoftimin e Prokurorisë.

Kështu, Prokuroria kundërshton vendimin e pafajësisë për Gjikës, dhe kërkon rishqyrtim të çështjes nga një trupë tjetër gjykuese.

Ndërkaq, Prokuroria e Apelit ka dërguar për rekurs edhe dosjen e ish-drejtoreshës Urbanistike Eleni Dardhaj.

(el.sp/BalkanWeb)

Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb