Në emisionin “Pikat mbi I” analisti Fatos Lubonja foli për protestën e pedagogëve në vend ku tha se kjo ka të bëjë me një dramë të madhe në vend, dhe se kryeministri nuk i llogarit fare personat e arsimuar.

Nga ana tjetër gazetari dhe analisti Artur Zheji tha se protesta ndodh sepse nuk ka para në fondin e shtetit, ndërsa deklaroi se kjo do të jetë një betejë e vërtetë dhe se më pas do të përfshihen patronazhistët për të ndaluar protestën.

Ai shtoi se protesta mund të fitojë pasi është popullore dhe jo politike, dhe nëse përfshihen aktorët e opozitës do të jetë edhe më e vështirë.

Lubonja:

Protesta ka të bëjë me një dramë të madhe. Po prodhodhen analfabetë funksionalë. T’i japësh dinjitet pedagogut do të thotë më shumë se rroga. Këta po kërkojnë rrogat e Kosovës e Maqedonisë, po ta krahasosh me Prishtinën e Shkupin do thuash se këtu po ndërtohet Europa, por pedagogët paguhen më pak se këto vende. Arsimi publik bazohet mbi të drejtë e arsimimit në kushtetutë. Kryeministri thotë ça janë këto shkolla universitete, na duhen shkolla profesionale, po nuk duhet të kemi ne biologë e matematicienë në vend. Kjo kërkon mësues shumë të mirë e specialist. Kjo është një neglizhim, këtu boll të jesh trafikant droge, quhesh biznesmen nesër dhe të nderojnë të gjithë. Nuk i ka fare në defter njerëzit me shkollë kryeministri. Autonomia ka të bëjë edhe me atë që vendos qeveria, në këtë aspekt ky nuk respekton asnjë.

Zheji:

Kjo ndodh sepse nuk ka para, aq më të ditur të jenë subjektet nuk e votojnë qeverinë. Nuk bëhen dele pedagogët, ndërsa pensionistët mund ta besojnë qevrinë dhe presin ndonjë qindarkë. Mendoj se do jetë betejë e vërtetë, Kur Rama të shohë veten në rrezik do kapen krerët e protestës nga patronazhistët një nga një. Pastaj do kapin familjet e profesorëve një nga një, do shohin partnerët e tyre nëse punojnë në shtet e me radhë.

Protesta fiton nëse nuk ndahen sepse do jetë popullore dhe jo politike. Nëse futen aktorët e opozitës që edhe ata i kanë lënë në pikë të hallit e shoh të vështirë. Kjo protestë i bën nder pedagogëve.

Këtu falsifikimi zë rrënjë që në klasat e para fillore, po prodhohet një brez që do jetë mjerim i vetes së vetë që kërkon vetëm një letër që tregon se ka studiuar. Autonomia është një faktor që mund ta kalosh arsimin publik në atë privat.

(BalkanWeb)