Analisti Fatos Lubonja tha në emisionin “Real Story” të gazetarit Sokol Balla, në News24, se Lëvizja Vetëvendosja e Albin Kurtit ka mbështetje të madhe për të negociuar me serbët.

Sipas Lubonjës, rreziku i ndryshimit të kufijve, që e bënte shumë të vështirë çështjen, tani është hequr, ndaj dhe zgjidhja është më e lehtë.

“Vetëvendosja ka mbështetje më të madhe për të negociuar me serbët pa qenë rreziku i kufijve, që e bënte shumë të vështirë çështjen. Mendoj se duhet të ketë dialog, të gjitha problemet duhen zgjidhur. Sa kohë që hiqet rreziku i ndryshimit të kufijve, mendoj se është më e lehtë zgjidhja. Neve na duhet një Evropë sociale, por mendoj se një rrezik që kanë këta është të përshpejtojnë procesin e bashkimit. Pra, frymën nacionaliste, se këta kanë një frymë nacionaliste dhe një frymë të majtë. Duhet ndërtuar një shtet i mirë”, tha Lubonja.

Më tej, analisti Lubonja u shpreh se “Të gjitha ndryshimet e rëndësishme kanë ndodhur o me luftë, o me ndikim nga fuqitë e mëdha. Ne nuk jemi të zotë për luftë. Unë nuk e shoh sot Evropën të gatshme të të lejojë për të marrë hapa të mëdha. E rëndësishme është për mua që këta të punojnë, që kosovarët të kenë më shumë liri, dinjitet, mirëqenie, dhe kjo të na ndikojë edhe neve në Shqipëri”.

 

(BalkanWeb)

Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb