Serie A kthehet të shpresojë se mund të mbyllë sezonin e ndërprerë për shkak të pandemisë. Pas përplasjeve të forta në distancë mes Federatës dhe qeverisë, kjo e fundit ka lëshuar terren, duke miratuar rikthimin e stërvitjes në grup duke nisur nga data 18 maj. Një hap përpara, por duhet pritur ende një vendim në lidhje me rinisjen e kampionatit.
Liga e Futbollit ka vendosur datën 13 qershor si më të mundëshmen për të kthyer ndeshjet, por fjalën e fundit e ka qeveria italiane. Ministri i sportit Vincenzo Spadafora ka zbutur tonet dhe qëndrimin e tij. Megjithëse ruan të pandryshuar idenë se gjithçka duhet të nisë në siguri të plotë, tashmë ai është pro hapjes së futbollit. Ndërkohë, edhe UEFA ka rritur presionin. Sipas “TuttoSport”, qeveria europiane e futbollit nuk do të pranojë çdo vendim për të mbyllur përpara kohe sezonin.
Gjithçka varet nga shkalla e përhapjes së virusit Covid-19 në secilin vend. Kjo do të thotë se pezullimi i kampionatit mund të vendoset vetëm nëse situata paraqet një rrezikshmëri të lartë dhe është e pamundur të luhet futboll. Si pasojë, kur vendimi nuk është i arsyetuar, sipas të përditëshmes italiane, pjesmarrja në Kupat e Europës nuk është e sigurtë.
(balkanweb)