TIRANE – Qeveria ka reaguar pas akuzave të ish-kryeministrit Sali Berisha për helikopterin e Forcave të Armatosura, i cili i referohet një videoje të publikuar nga portali syri.net, që tregon një helikopter teksa ulet pranë doganës së Hanit të Hotit. Berisha pretendon se përpara se të rrëzohej, helikopteri i Forcave të Armatosura është ulur në doganën e Hanit të Hotit, ku sipas tij, ka dyshime se është ngarkuar me mermer, për ta transportuar në rezidencën e ministres Kodheli në Vermosh.

Qeveria sqaron se “helikopteri EC 145 me numër anësor 637, në orën në të cilën portali pretendon se është ulur në doganën e Hanit të Hotit, ka qenë në një fluturim të planifikuar në jug të Shqipërisë, fluturim të nisur në orën 09:10 të mëngjesit të ditës së djeshme me itinerarin, Farkë-Belsh- Gllavë- Tepelenë- Skerficë -Butrint- Ksamil- Sarandë- Llogara- Akerni- Lushnje, e në fund është ulur pa problem në bazën e Farkës”.

“Ndërkaq, siç është thënë më herët, helikopteri është nisur nga Farka në orën 12:10 dhe po kryente fluturim rutinë stërvitor rikonjicioni, sipas planit të fluturimit të bazës ajrore Farkë, në intenerarin Farkë-Tujan-Qafë Murr-Qafë buall-Shupenzë-Peshkopi-Kukës-Qafë Luzhë-Qafë Valbonë-Vermosh-Rapstarje-Koplik-Shkodër-Farkë.”- thuhet në reagim.

“Helikopteri i shfaqur në videon e portalit syri.net është civil, me përmasa më të mëdha dhe pa shenja dalluese të Forcës së Armatosur. Në këtë video gjithashtu dallohet qartësisht se helikopteri është i pajisur me rrota. Ndërkohë që asnjë helikopter i FA-ve nuk është i pajisur me rrota, por janë të pajisur me sistemin me slitë. Sa më sipër aludimet e portalit syri.net janë të pavërteta dhe për më tepër dashakeqe. Ftojmë median të distancohet nga abuzimet që nuk ndalen as përpara humbjes së jetës së dy pilotëve të Forcave të Armatosura në krye të detyrës.”- bën të ditur qeveria.
(er.nu/BalkanWeb)