Gjithçka e arritur mes tre palëve, por ultrasit kanë prishur transferimin. Nuk është fabul e ndonjë historie të futbollistëve të urryer që është xhiruar në film, por situata që po kalon Ergys Kaçe për të ardhmen e tij.
Së fundmi, skuadra e APOEL-it në Qipro ka kërkuar me ngulm shërbimet e shqiptarit dhe PAOK-un së bashku me vetë futbollistin kanë rënë dakord për këtë transferim.
Mirëpo, mediat qipriote kanë bërë me dije se janë ultrasit e skuadrës që kanë shpërthyer në reagime kundër këtij afrimi në merkato. Arsyeja: Është shqiptar dhe foto e postuar para disa vitesh nga mesfushori ku shfaqej me bluzën e UÇK-së.
APOEL – Para disa vitesh, ekzaktësisht në sezonet 2008- 2010, Altin Haxhi ka qenë pjesë e kësaj skuadre pa pasur as më të voglin problem.
Mirëpo, ultrasit e ekipit qipriot, që në momentin kur kanë mësuar tratativën e trajnerit George Dionis, ish-tekniku i PAOK-ut, kanë shpërthyer në protesta.
Mesfushori kuqezi do të huazohej për të vendosur në verë të ardhmen përfundimtare.
Ish-trajneri i mesfushorit shqiptar ka kërkuar nga drejtuesit afrimin e mesfushorit të Kombëtares dhe mes palësh është gjetur akord edhe me agjentin e Kaçes, por edhe me drejtuesit e PAOK-ut.
Ndërkohë që sot ishte planifikuar udhëtimi i shqiptarit drejt Qipros, gjatë ditës së djeshme, klubi është “sulmuar” disa herë nga tifozët.
Protestat – Përfaqësues të ultrasve fanatikë të ekipit kanë bërë disa herë takime me drejtuesit për të mos lejuar afrimin e Kaçes për faktin e origjinës së tij: Është shqiptar.
Nga sa bëhet me dije, arsyeja e kundërshtimit të ultrasve është foto e disa viteve më parë, kur Kaçe u shfaq i fotografuar me një bluzë në të cilën ishte vizatuar flamuri shqiptar, si dhe logo e Ushtrisë Çlirimtare të Kosovës, UÇK.
Njohja e trajnerit të APOEL-it mbi lojtarin ka bindur palët që ky transferim të kryhet, por mbetet për t’u parë nëse dita e sotme do të jetë ajo e firmës së lojtarit në kontratë me skuadrën e re, siç ka qenë parashikuar prej ditësh, apo klubi është tërhequr përfundimisht dhe ka prishur në mënyrë zyrtare tratativën për afrimin e mesfushorit të Kombëtares në skuadër. /PanoramaSport- http://www.panorama.com.al/sport/racizmi-ndaj-kaces-ja-si-tifozet-e-apoel-it-i-bllokuan-transferimin-prej-fanelles-me-uck-ne/
