Rama i kërkoi dje të tërhiqet nga gara ish- kreut të PS në Sarandë, kandidati i pavarur: Nuk ka kthim pas! Sot vendosin qytetarët, jo partitë

Ndërkohë që zhvillonte takimin në Sarandë në kuadër të fushatës së 14 majit, kryeministri Edi Rama i kërkoi ditën e djeshme ish- kryetarit të PS në këtë qytet, tashmë kandidat i pavarur në garë për qytetar të parë, Gjegj Mërkuri, që të braktiste betejën e pas zgjedhjeve të kthehej në PS.

Sot ka reaguar zoti Mërkuri, i cili u shpreh sot vendosin qytetarët e jo partitë dhe se nuk ka kthim pas.

Postimi i plotë:

Të dashur miq, slogani ynë i kësaj fushate elektorale për Bashkinë e Sarandës “Vendosin qytetarët, jo partitë”, bëri të kuptojnë qartë të gjithë aktorët politikë fitoren tonë në 14 maj. Ne jemi të bashkuar dhe me një ambicie të vetme, që në 14 maj të triumfojë qytetaria. Ne jemi futur në këtë garë që të fitojmë dhe ta çojmë Sarandën në një fazë tjetër zhvillimi, duke u bazuar në dashurinë që kemi për këtë qytet ku ushtrojmë aktivitetet tona jetësore të përditshme.
Ditën e djeshme Saranda u vizitua nga kryeministri i Shqipërisë, Z. Edi Rama, duke dëgjuar fjalët e mira në adresën time dhe kërkesën e tij, ne si qytetarë i përgjigjemi me sloganin e tij të fushatës elektorale:
“NUK KA KTHIM MBRAPA, VETËM PËRPARA”.
Teksa na ndajnë dhe një javë nga data zgjedhjeve unë informoj të gjithë bashkëqytetarët e mi se fushata jonë vazhdon intensivisht dhe këtë javë. Ne do të jemi kudo, do të flasim me çdo qytetar që e do Sarandën, të majtë dhe të djathtë qofshin. Kjo nuk është një betejë poltike, kjo është një betejë për Sarandën dhe qytetarët do të triumfojnë në 14 maj.
Ndaj këtë javë ftoj çdo mbështetës dhe simpatizantë, të flasë me këdo që mundet, të përcjellë mesazhin në çdo cep të qytetit, të unifikojmë forcat, pasi nga fitorja na ndan vetëm një javë. VENDOSIN QYTETARËT, JO PARTITË