TIRANË- Moderatorja dhe gazetarja e emisionit “Studio e Hapur” në News24 Eni Vasili ka folur për personazhet dhe të ftuarit e saj nga politika, duke iu referuar shprehjes emocionale të tyre dhe rastit të kryeministrit Edi Rama që u përlot në emision kur kujtoi akuzat për familjen.
Ajo tha se këto momente i bëjnë mirë audiencës së emisionit, por se edhe politikanët janë njerëz. Vasili thotë se Rama nuk është i vetmi që është përlotur në intervistë me të dhe se personazhet me një jetë të gjatë politike kanë pengje të mëdha për sa i takon familjes.
“Sigurisht i bën mirë audiencës, emisionit. Në fund fare njerëzit që kemi përballë, politikanët janë edhe njerëz. Ajo që kam vënë re në disa përballje të tilla dhe në disa përlotje të tilla sepse Rama nuk ka qenë i vetmi gjatë këtij sezoni të “Studios së Hapur” që është përlotur në intervistë me mua, është që të gjithë këto personazhe që kanë një jetë të gjatë politike, kanë pengje të mëdha sa i takon familjes, pra ndihen në faj për faktin që nuk i kanë kushtuar shumë rëndësi fëmijëve, nuk kanë jetuar fëmijërinë e tyre apo që nuk i kanë dhënë martesës së tyre aq kohë sa duhet. Edhe po të dish t’i prekësh në ato tasta, emocionohen si çdo njeri dhe ata”, tha Vasili pir emisionin “Jo vetëm modë”.
(m.k/BalkanWeb)
