Trajneri i Francës, Didier Deschamps, e ka cilësuar si një gabim gjigand atë të Adrien Rabiot, 23-vjeçarit që nuk ka pranuar të jetë në listën e lojtarëve që do të qëndrojnë në pritje për praninë në Kupën e Botës 2018.

Deschamps nga qendra stërvitore e Francës ka deklaruar se futbollisti i ka nisur një letër ku i tregonte se nuk ishte përgatitur për të qenë një lojtar në pritje dhe se duhej të gjente dikë tjetër.

Mesfushori i Paris Saint-Germain nuk u përfshi në listën e 23 futbollistëve “blu” të grumbulluar për Kupën e Botës, por ishte mes atyre që do të grumbulloheshin nëse do të kishte pasur ndonjë dëmtim para fillimit të veprimtarisë në Rusi.

“Padyshim që u habita. Unë mund ka kuptoj zhgënjimin e tij të madh, por ai ka bërë një gabim gjigant që nuk pranoi të ishte në listën e pritjes. Shpresoj të rritet dhe ti mendoj më mirë gjërat në të ardhmen. Kur luan në nivelet më të larta nuk mund ta lejosh veten të përfshihesh nga emocionet,” – tha Deschamps.

Supriza e listës së Deschamps ishte se zgjodhi mesfushorin e Sevilla, Steven Nzonzi, në vend të Rabiot. “Skuadra e Francës është mbi gjithçka, por jam i habitur nga reagimi i Rabiot sepse ai është një futbollist i ri dhe e ka karrierën përpara vetes. Nuk duhet ta refuzonte faktin që ishte në pritje dhe ndoshta mund të grumbullohej në minutën e fundit për në Kupën e Botës. Nuk dua të marr vendime radikale për të ardhmen, gjendja është kjo që është, ai nuk është pjesë e Francës.”

(e.k/BalkanWeb)

Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb