Një stuhi e fuqishme ka shkaktuar tornado në jug të SHBA-së dhe ka sjellë reshje të mëdha bore dhe mot ekstrem në të gjithë SHBA-në dhe pjesë të Kanadasë.

Stuhia ka plagosur disa persona në Teksas dhe ka dëmtuar ndërtesa.

Rreth 9,000 fluturime në SHBA u vonuan të hënën dhe të martën pasi stuhia shpërtheu në të gjithë vendin, sipas FlightAware.com.

Moti gjithashtu ka mbyllur rrugët në disa shtete perëndimore që presin deri në 60 cm borë. Stuhia mund të prekë banorët në pothuajse çdo shtet në SHBA, thanë ekspertët.

“Është një stuhi mjaft e fuqishme,” tha Rich Otto, një meteorolog në Qendrën e Parashikimit të Motit. “Kjo është pak më e madhe se stuhia mesatare e dimrit.”

“Njerëzit duhet të qëndrojnë në shtëpi gjatë ditës [të martën] nëse jetojnë në veri,” shtoi ai.

Moti më i keq filloi të hënën mbrëma dhe pritej të vazhdonte deri të mërkurën, duke goditur High Plains qendrore dhe veriore, një rajon i SHBA-së që përfshin Montanën lindore, Wyoming, Dakotën e Jugut dhe Nebraskën, tha Otto.

Këto shtete pritet të kenë erëra të forta me shpejtësi mbi 40 mph (64 km/h) dhe reshje të dendura bore.
Më shumë se 20 milionë njerëz ishin nën paralajmërimet e motit të rëndë në SHBA të martën.

Paralajmërimet për stuhi nga Shërbimi Kombëtar i Motit ishin gjithashtu në fuqi për të gjitha ato shtete, si dhe Kolorado. Ato shkaktohen nga erërat me shpejtësi të paktën 35 mph të shoqëruara me reshje të dendura bore.

Reshjet e dendura të borës të kombinuara me erëra të forta do të krijojnë shikueshmëri të ulët dhe kushte “të pasigurta” udhëtimi, tha zoti Otto.

Stuhia është përhapur edhe në Kanada, me borë të dendur dhe erëra të forta që kanë goditur rajonin jugor të vendit, duke përfshirë provincat e Saskatchewan dhe Manitoba, të martën dhe të mërkurën.

Teksasi, në jug, u godit nga një seri stuhish që shkaktuan tornado të shumta në pjesën veriore të shtetit, duke përfshirë një në Wise County, afër Dallasit, që dëmtoi shtëpitë dhe bizneset, sipas autoriteteve lokale.

Të paktën shtatë persona në Teksas u plagosën nga moti i keq, sipas zyrtarëve të qeverisë lokale.

Moti ekstrem pritet të vazhdojë gjatë pjesës më të madhe të kësaj jave, thanë ekspertët, pasi ai shtyn drejt lindjes në rrafshinat qendrore deri të enjten.

Lugina e poshtme e Misisipit përballet me mundësinë e stuhive të forta, breshrit dhe përmbytjeve, sipas Shërbimit Kombëtar të Motit.

Sistemi i stuhisë filloi të godasë SHBA-në të premten e kaluar, duke sjellë erëra të fuqishme në Kaliforni.
Vargu malor i Sierra Nevada në Kaliforninë veriore raportoi 5 metra borë në disa zona gjatë fundjavës, duke detyruar disa autostrada të mbyllen dhe duke shkaktuar paralajmërime për ortekët në zonë deri të hënën mbrëma.

Sondazh


Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb
Etiketa: