Reuters i ka kushtuar një shkrim dorëzimit dhe arrestimit të Klement Balilit ditën e sotme në policinë shqiptare. Ndër të tjera Reuters shkruan se ai kishte lidhje politike me Lëvizjen Socialiste për Integrim.

SHKRIMI I PLOTË
Një nga trafikantët më të kërkuar të drogës në Shqipëri u dorëzua në polici të martën pas pothuajse tre vjetëve në arrati me akuza për trafik të narkotikëve në Greqinë fqinje.

Klement Balili kishte shmangur kapjen që nga maji i vitit 2016, falë rrjetit të tij të mbështetjes në zonën jugore bregdetare të Sarandës dhe lidhjeve të dyshuara politike, duke hedhur dyshime mbi vendosmërinë e Shqipërisë, anëtare e NATO-s në luftimin e bosëve të mëdhenj të krimit.

Në shkurt 2017, presioni nga vendet e saj aleate perëndimore detyruan Shqipërinë të mbledhë këshillin e sigurimit për ta kthyer kapjen e Balilit në prioritet që kur rrethi i tij i drogës u përhap në territorin e vendeve fqinje dhe aleatëve të NATO-s.

Ministri i Brendshëm Sandër Lleshaj u tha gazetarëve se arrestimi i Balilit nga policia shqiptare, e cila kishte organizuar më shumë se dhjetëra operacione të dështuara për ta kapur atë, kishte bërë një “kërcim historik” në tejkalimin e “dështimit” të tyre për të kapur bosin e mëdhenj të krimit.

“Dorëzimi i tij ishte rezultat i një operacioni të thellë, të gjerë dhe kompleks në bashkëpunim me partnerët e Shqipërisë”, tha Lleshaj,
I pyetur se çfarë i ishte ofruar Balilit për t’u dorëzuar, Lleshaj tha: “Sigurimi i një procesi të drejtë ligjor”.

Apelet e vazhdueshme të ish-ambasadorit amerikan Donald Lu për të kapur Balilin e shtynë Kryeministrin Edi Rama të thërrasë policinë për të siguruar që ai do ishte në paraburgim para se zëvendësuesi i Lu të mbërrijë.

Balili mohoi çdo përfshirje dhe u shfaq publikisht kur policia greke, duke punuar me DEA-n amerikane, e akuzoi atë për transportimin e 700 kg kanabis në Greqi. Sidoqoftë, ai shpejt mori arratinë.

Avokati grek i Balilit pretendoi se Greqia kishte ngritur një çështje delikate kundër tij dhe avokati i tij shqiptar Theodhori Sollaku tha të martën se provat ishin të dyshimta.
Balili, 48 vjeç, drejtonte Drejtorinë e transportit të Sarandës, e gjithashtu zotëronte një hotel luksoz bregdetar dhe kishte një pjesë në një tjetër, deri në fillim të vitit 2016.

Ai kishte lidhje politike me Lëvizjen Socialiste për Integrim, e cila ishte një partner i vogël në koalicionin qeverisës të udhëhequr nga Partia Socialiste nga 2013-17, kur Rama hoqi dorë prej tyre për të fituar një mandat pa aleatë.

(m.k/j.d/BalkanWeb)