Revista prestigjioze amerikane me bazë në Nju Jork rendit Shqipërinë, si një nga 15 destinacionet më të mira në mbarë botën, në një listë ku përfshin edhe emra me traditë në fushën e industrisë së turizmit siç janë Izraeli, Koreja e Jugut, Japonia, Egjipti, Peruja, India e Meksika.
Revista “Travel + Leisure” e ka cilësuar Shqipërinë si destinacionin më të lartë në mbarë botën, duke sugjeruar që ajo të jetë destinacioni numër një për t’u konsideruar për pushimet e ardhshme, përcjell albinfo.ch.
Renditja bazohet në progresin e bërë në raportin e fundit të “Tourism Competitiveness” nga Forumi Ekonomik Botëror për këtë vit, ku Shqipëria është ngjitur me 8 vende, duke e bërë atë si nga 15 destinacionet, që kanë regjistruar përparimin më të madh në dy vitet e fundit.
Riviera shqiptare dhe Gjirokastra janë dy nga destinacionet kryesore për t’i vizituar. Industria e Turizmit ka pësuar një rritje të shpejtë në vitet e fundit, duke tërhequr më shumë se 4 milionë turistë dhe duke fituar rreth 1.5 miliardë euro.
Më parë, Shqipëria u vlerësua si nga 17 destinacionet më të mëdha botërore që duhet vizituar gjatë vitit 2017 nga “CNN”, duke e futur Shqipërinë me emra të mëdha, si Amerikën, Kanadanë, Francën, Danimarkën, Kinën dhe Australinë.
(d.d/BalkanWeb)
