Kryetari i Partisë së Lirisë, Ilir Meta ka nxjerrë videon e kryeministrit Edi Rama 4 vite më parë, teksa u pyet për rikthimin e basteve sportive.

Ish-Kreu i Shtetit, i cili e ka dekretuar ligjin për mbylljen kur ishte President tha se “Rama është një delenxhi dhe aventurier që përpiqet të vendosë monopolin”.

“Është një sfidë që e ndalon Kurani. Po, e ndalon. Jo, unë nuk e kam bërë (ndalimin e bixhozit) për shkak të Kuranit, por e ndalon Kurani. E thotë bukur, nuk e mbaj mend saktësisht, e thotë një nga verset i Kuranit”, deklaronte Rama në video.

Pyetje: Sot Rama bëri një dëgjesë me grupet e interesit për rikthimin e basteve. Duke qenë se ju e keni dekretuar si president, ndërsa tani është një iniciative e Ramës për ta rikthyer pas deklaratave të Ramës se është edhe kurani që i ndalon bixhozet.

Ilir Meta: E dini edhe ju, treguesi i koherencës së jashtëzakonshme, të një delenxhiu i cili me shqetësimin gjoja për të ruajtur fëmijët nga këto aktivitete kriminale dhe shoqërinë tonë vendosi mbylljen atëherë dhe tani gjen gjoja një alibi, sikur ka ka hallin të ndihmojë sportin, se kush e ka penguar këtë të ndihmojë sportin, kur harxhon miliona me inceneratorët, këtë e kuptojmë. Por është thjesht përpjekja për të vendosur monopolin e klientelës së tij edhe sa i takon lojërave të fatit. Dihet që ky është kaq aventurier se mund të luajë me bixhoz dhe të vërë në baste të ardhmen e një vendi të tërë.