Pasi qëlloi në shenjë me Zlatan Ibrahimovic, siç kanë treguar dy ndeshjet e para të sulmuesit suedez pas rikthimit në Serie A, Milan vazhdon të jetë aktiv në merkaton e dimrit. Me misionin për të forcuar skuadrën në pjesën e mbetur të sezonit, klubi kuqezi zyrtarizoi afrimin e dy lojtarëve të tjerë.

Simon Kjaer dhe Asmir Begovic. Mbrojtësi danez vjen në formë huazimi nga Sevilla, që më parë e kishte xhiruar për gjashtë muaj tek Atalanta. Ndërkohë, me të njëjtën formulë vjen edhe portieri boshnjak, që merr vendin e Pepe Reina të transferuar në Premier League te Aston Villa.

Ndërkohë, Milan po punon edhe në disa fronte të tjerë, por pengesë për momentin është e ardhmja e Suso. Pak muaj më parë konsiderohej i pazëvendësueshëm, por spanjolli ka zhgënjyer me paraqitjet e tij. I kontestuar edhe nga tifozët kuqezi, Suso ka kërkuar të largohet, por drejtuesit milanistë nuk e lenë të lirë pa një ofertë sipas kushteve të tyre.

Mediat italiane kanë zbuluar edhe një tratativë të bujshme me rivalët e përjetshëm të Inter. Duke qëndruar në atë që raportojnë të përditëshmet përtej Adriatikut, dy klubet milanezë projektojnë një shkëmbim kokë më kokë mes Kessie dhe Vecino.
(balkanweb)