Kryetari i Kuvendit, Gramoz Ruçi ka pritur në zyrë në një takim ambasadorin e Kosovës, Nait Hasani.

Ruçi i ka shprehur mbështetje Hasanit për Kosovën teksa e garantoi se Shqipëria do të jetë krah saj për përballimin e sfidave të ardhshme.

Gjithashtu Ruçi theksoi nevojën e madhe për të unifikuar qëndrimet politike e kombëtare të Kosovës dhe për Kosovën për dialogun me Serbinë.

 

NJOFTIMI NGA KUVENDI

Kryetari i Kuvendit, z. Gramoz Ruçi, priti Ambasadorin e Kosovës, z. Nait Hasani, me rastin e përfundimit të misionit të tij në Shqipëri.

Kryetari Ruçi e falenderoi Ambasadorin Hasani për kontributin e tij për forcimin dhe zgjerimin e bashkëpunimit midis Shqipërisë dhe Kosovës. Z. Ruçi nënvizoi se “Shqipëria, ashtu si deri tani, do të jetë në mbështetje të Kosovës, për përballimin e sfidave të sotme dhe të ardhme. Bashkimi Europian është i vetmi destinacion i të ardhmes së Kosovës dhe Serbisë. Është shumë premtues fakti që SHBA dhe BE kanë qëndrime të njëjta mbi dialogun Kosovë-Serbi. Kosova i ka të gjitha arsyet dhe mundësitë që të jetë një partner më i besueshëm se Serbia në raport me Shtetet e Bashkuara dhe Bashkimin Europian. Prandaj është i nevojshëm edhe unifikimi i qëndrimeve politike e kombëtare të të gjitha institucioneve, forcave politike dhe zërave publikë, kombëtarë e ndërkombëtarë, të Kosovës dhe për Kosovën si edhe për dialogun me Serbinë.”

Ambasadori Hasani falenderoi Kryetarin e Kuvendit Gramoz Ruçi për mbështetjen politike, institucionale dhe personale për sfidat me të cilat përballet sot Kosova dhe shprehu bindjen se edhe në të ardhmen Shqipëria dhe Kuvendi i Shqipërisë do të jenë në krah të Kosovës për përballimin e këtyre sfidave.

(BalkanWeb)

Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb