Një person ka vdekur në një zjarr që shpërtheu mëngjesin e sotëm në qendrën e madhe tregtare Mega Khimki, në periferi veriperëndimore të Moskës, jo shumë larg aeroportit Sheremetyevo, njoftoi departamenti i Ministrisë së Emergjencave, siç raporton Tass.
“Fatkeqësisht një person ka mbetur i vrarë (nga zjarri).
Po punohet për shuarjen e zjarrit”, tha kreu i ministrisë, Sergey Poletykin. E gjithë struktura është përfshirë nga flakët, të cilat u përhapën në një sipërfaqe prej 18 mijë metrash katrorë.
“Punëtorët janë larguar nga ndërtesa në pamundësi për të shuar zjarrin”, shkruan Tass , ndërsa Interfax bën të ditur se “zjarrfikësit po luftojnë me zjarrin i cili është përhapur në një sipërfaqe prej 7 mijë metrash katrorë”. Supermarketi OBI është shkatërruar plotësisht. Zjarri ka rënë disa minuta para orës 06:00 me orën lokale (04:00 me orën tonë), fillimisht në një sipërfaqe prej 250 metrash katrorë, duke shkaktuar vdekjen e një personi, i identifikuar si roje.
Inteligjenca ruse, e cituar nga Interfax, flet për dyshimin e “një akti të qëllimshëm kriminal”, duke cituar burime të paidentifikuara. Por duke patur parasysh origjinën e zjarrit, gjurmët të çojnë tej një aksident, dhe nuk janë përjashtuar masat e sigurisë. Në të vërtetë, sipas Tass, “shkaku i zjarrit ishte një shkelje e rregullave për kryerjen e punimeve të saldimit në hipermarketin e bashkangjitur OBI, i cili ishte në rindërtim”.
Fillimisht u raportua se shërbimet ruse të urgjencës dyshojnë se zjarri mund të jetë shkaktuar nga një akt “kriminal”. Por vetë një anëtar i shërbimit, i cituar nga Tass, tha se një qark i shkurtër në një dyqan Obi ka shkaktuar katastrofën. “Zjarri në dyqanin Obi u ndez nga një qark i shkurtër. Një shpërthim shkaktoi përhapjen e flakëve”, tha burimi. Shkaku i saktë i zjarrit do të përcaktohet nga një hetim, tha agjencia ruse e lajmeve.
