Rusia ka deklaruar se do t’i japë vaksina Koresë së Veriut, e cila ka mbyllur kufijtë e saj për shkak të pandemisë së koronavirusit të ri (COVID-19) dhe është në rrezik nga uria.

Sipas lajmit të faqes së internetit “Nknews.org”, ministri i Jashtëm rus, Sergej Lavrov në një konferencë për media dje iu përgjigj pyetjes rreth situatës në Korenë e Veriut.

“Në kontaktet e ambasadës sonë me përfaqësuesit e udhëheqjes së Koresë së Veriut, ne kemi thënë shumë herë se jemi të gatshëm të ndihmojmë nëse është e nevojshme. Kjo natyrisht vlen edhe për vaksinat dhe furnizimet mjekësore”, tha ministri Lavrov.

Duke theksuar se Koreja e Veriut ka izoluar veten nga bota e jashtme për të parandaluar përhapjen e COVID-19 që nga fillimi i pandemisë, Lavrov theksoi se masat në fjalë krijuan një situatë të ngjashme me një mbyllje të plotë.

Paralajmërim se “do të jetë e pamundur të vazhdohet jetesa”.

Ambasada ruse në Phenian në një deklaratë në prill, paralajmëroi se do të ishte e pamundur të jetosh nën kufizime kaq të ashpra. Ambasada veçanërisht theksoi mungesën e pajisjeve mjekësore.

Tajfunët që ndodhën në Korenë e Veriut në fund të vitit 2020 kishin dëmtuar zonat e kultivuara dhe të korrat.

Qeveria e Phenianit mbylli kufijtë e saj për shkak të pandemisë dhe ndaloi tregtinë e ushqimit me Kinën.

OKB-ja në raportin e saj të publikuar dje, tha se në Korenë e Veriut këtë vit kishte një deficit ushqimor prej 860 mijë tonë.//AA