Rusia ka miratuar së fundmi ligjin për ndalimin e promovimit të të ashtuquajturës “propagandë homoseksuale”, e cila paralajmërohet se do të vlejë për të gjithë personat e rritur.
Masa përfaqëson një ashpërsim të një ligji ekzistues të vitit 2013, i cili e bën dhënien e informacionit për të qenit LGBT te fëmijët një vepër penale, ndërsa të dënuarit mund të përballen me gjoba të mëdha për promovimin e asaj që Rusia i quan “marrëdhënie jo tradicionale”.
Në fillim të kësaj jave, zyrtarët u kishin kërkuar politikanëve në dhomën e ulët të parlamentit të Rusisë që të miratonin zgjatjen e ligjit duke e portretizuar atë si pjesë të një beteje më të gjerë mbi vlerat civilizuese me Perëndimin dhe duke e lidhur atë me vendimin për të pushtuar Ukrainën.
Sipas propozimit, informacioni rreth “mënyrave jotradicionale të jetesës” ose “refuzimit të vlerave familjare” do të konsiderohej ligjërisht i njëjtë me pornografinë, promovimin e dhunës ose nxitjen e tensioneve racore, etnike dhe fetare.
Një element tjetër i shtesave ndalon informacionin që mund të “shkaktojë të miturit dëshirën për të ndryshuar seksin”, një referencë për personat transgjinorë.
(BalkanWeb)
