Për herë të parë, një civil në Rusi raportohet se ka humbur jetën si rezultat i bombardimeve ndërkufitare nga Ukraina. Një pretendim i tillë është bërë nga
Guvernatori i rajonit të Belgorodit, Vyacheslav Gladkov, i cili tha se një person u vra gjatë granatimeve të fshatit Solokhi.
Solokhi është një fshat dhjetë kilometra larg kufirit me Ukrainën.
“Popullsia e fshatit Solokhi do të dërgohet në një vend të sigurt nën udhëheqjen e kreut të distriktit, Vladimir Pertsev, dhe kreut të Ministrisë rajonale të Situatave të Emergjencave, Sergej Potapov,” tha Gladkov.
Rajoni i Belgorod ka parë disa shpërthime në javët e fundit që duket se janë shkaktuar nga raketa dhe bomba. Ukraina as nuk e ka konfirmuar dhe as mohuar të jetë përgjegjëse për shpërthimet.
Javën e kaluar, Gladkov tha se pesë shtëpi ishin shkatërruar në një fshat tjetër, Nekhoteevka.
“Sot kanë mbetur pak më pak se 30 persona në vendbanim. Ne kemi evakuuar tashmë shumicën e njerëzve në siguri” tha ai atëherë.