Këtë të premte mbahet seanca gjyqësore në Gjykatën e Tiranës, ndaj nënës lehonë Diana Bahçe.
Ndërkohë Arbiona Halimi, Miranda Rira së bashku me disa gra nga forumi i Partisë së Lirisë, dhe PD ndodhen në burgun e ri të grave.
Kjo për shkak se kërkojnë lirimin e nënës lehonë, Diana Bahçes të arrestuar, pasi gjykata e shkallës së parë në Tiranë i ka vendosur një gjobë në vitin 2020 prej 2 milionë e 500 mijë lekë të vjetër duke ia konvertuar një javë më parë, pra pas tre vitesh me burg një muaj e 20 ditë.
Në një komunikim për mediat, Miranda Rira tha se ky veprim është i pafalshëm dhe se drejtësia duhet të shkojë në vend.
“Drejtësia duhet të vihet në vend. Askush nuk ndëshkon ata që janë zhytur në korrupsion, por kur vjen fjala për të ata që janë të dobët atëherë del në pah forca e ligjit. Sot jam këtu si nënë të jap zërin tim, për të bashkuar forcat dhe për të ndihmuar këtë grua. Është një foshnje vetëm 18 ditë sot. 18 ditë fëmija të jetë pa nënë, kjo është çmenduria më e madhe. Diana Bahçe duhet liruar sot dhe duhet të dërguar pranë foshnjës së saj.”, tha ajo.
Ndërkohë bashkëshorti i Dianës disa ditë më parë ka bërë thirrje për lirimin e saj për shkak se nuk mund të kujdeset ai për djalin, i cili u shkëput nga nëna teksa ishte vetëm 8 ditësh.
(BalkanWeb)
