Me kërkesë të Prokurorisë së Elbasanit, gjykata ka vendosur sekuestro preventive ndaj 4200 m2 tokë të ish-Ndërmarrjes Bujqësore Elbasan, e dyshuar si e përfituar në bazë të dokumenteve te falsifikuar nga ana e familjes Floqi.
Nga hetimi i Prokurorisë së Elbasanit rezulton se kjo sipërfaqe toke është përfituar duke përdorur një seri dokumentesh të falsifikuara ndër vite, duke arritur që pjesëtarët e familjes të marrin jo vetëm titullin e pronësisë mbi atë tokë, por të përfitojnë kompensim në vlerën e rreth 32 milionë lekëve të reja, për faktin se një pjesë e kësaj sipërfaqeje është zënë nga ndërtimet informale.
Në mënyrë më të zgjeruar, nga hetimi i Prokurorisë së Elbasanit ka rezultuar se:
1. Pasardhësit e të ndjerit Azem Floqi (vdekur ne vitin 1975), kane aplikuar në vitin 1994 për të përfituar pronën 4200 m2, me pretendimin se paraardhësi i tyre, Azem Floqi, ka qenë një prej themeluesve të Ndërmarrjes Bujqësore Elbasan, duke kontribuuar me sipërfaqe 4200 m2 tokë.
2. Pasardhësit e familjes Floqi, në vitin 1995, kanë marrë nga Bashkia Elbasan kopje të një proces-verbali të vitit 1966, ku pretendojnë se shkruhet që Azem Floqi ka kontribuuar me 4200 m2 tokë për Ndërmarrjen Bujqësore (dokumenti i vitit 1966 ka vështirësi në lexim).
3. Në bazë të këtij dokumenti, përfaqësuesit e familjes Floqi i janë drejtuar gjykatës së Elbasanit, e cila, me një vendim në vitin 1995 u ka njohur pronësinë pasardhësve Floqi.
4. Kjo hapësire, e cila më pas është zënë nga ndërtime informale, u regjistrua në emër të pasardhësve të familjes Floqi.
5. Duke qenë se një pjesë e kësaj hapësire toke (rreth 1900 m2) tokë është zënë nga ndërtimet informale, familja Floqi përfiton në vitin 2015 kompensim në vlerën totale mbi 32 milionë lekë të reja. Nga kjo shumë, deri më tani, u është lëvruar 57% e kësaj shume, rreth 17 milionë lekë të reja.
Nga hetimi i Prokurorisë së Elbasanit janë krijuar dyshime të arsyeshme se kjo tokë është përfituar në mënyrë të paligjshme, në bazë të dokumenteve të falsifikuara.
Nga hetimi ka rezultuar se dokumenti i vitit 1996, në bazë të të cilit u është njohur pronësia pasardhësve të Azem Floqi, është falsifikuar. Nga ekspertiza që i është bërë këtij dokumenti rezulton se emri “Azem” në dokument është mbivendosur mbi emrin e mëparshëm, “Avram”. Pra, rezulton se kontribuues i tokës 4200 m2 për ish-Ndërmarrjen Bujqësore Elbasan është Avram Floqi dhe jo Azem Floqi.
Në këto kushte, Prokuroria e Elbasanit ka krijuar dyshime të arsyeshme se të gjithë proceset që kane ndjekur pasardhësit e Azem Floqit mbështeten në dokumente të falsifikuara.
Për këtë arsye, nga provat e përfituara deri në këtë fazë të hetimit, Prokuroria Elbasan kërkoi sekuestrimin e pronës 4200 m2, e regjistruar në emër të pasardhësve të familjes Floqi. Kërkesa e Prokurorisë u pranua nga Gjykata e Elbasanit.
(m.k/BalkanWeb)
