Tirana ka mirëpritur organizimin e seminarit 3-ditor të platformës ndërkombëtare “eTwinning” me në fokus kryesor shkëmbimin e përvojave në kushte pandemie për mësuesit e arsimit fillor dhe atij të mesëm të ulët.
Në këtë aktivitet ku marrin pjesë mësues nga 14 shtete të ndryshme të botës, ishte edhe ministrja e Arsimit, Sportit dhe Rinisë Znj. Evis Kushi, e cila në fjalën e saj përshëndetëse theksoi rëndësinë e veçantë që ky seminar 3-ditor ka për zhvillimin profesional të mësuesve, shkëmbimin e përvojave dhe bashkëpunimin në projekte të ndryshme kurrikulare.
“Pavarësisht të gjitha vështirësive e problemeve me të cilat u përballëm gjatë situatës së pandemisë, ne asnjëherë nuk e nënvlerësuam zhvillimin profesional të mësuesve, si dhe trajnimin e kualifikimin e tyre. Madje, akoma më shumë kemi punuar me partnerët tanë ndërkombëtarë që mësuesit të përshtateshin sa më shumë dhe sa më shpejt me kushtet e reja të pandemisë dhe mësimit “online”- tha ajo.
Në fund, Znj. Kushi nënvizoi se paralelisht me fuqizimin dhe zgjerimin e mëtejshëm të projektit “eTwinning”, “ne do të punojmë gjithmonë për zhvillimin profesional të mësuesve. Do të jemi në mbështetje të mësuesve, sepse nxënësit tanë meritojnë më të mirën!”
(BalkanWeb)
