Tre ushtarë amerikanë kanë humbur jetën si pasojë e rrëzimit të një helikopteri ushtarak në shtetin New York në SHBA.

Sipas njoftimit nga Divizioni i Shtetit i Çështjeve Ushtarake dhe Detare, ushtarët ishin në një helikopter evakuimi mjekësor kur u rrëzua në afërsi të zonës Mendon në jug të qytetit Rochester.

Tre ushtarët po ndihmonin policinë e New York-ut në sigurimin e Kapitolit në Ditën e Inaugurimit të presidentit të zgjedhur, Joe Biden, në rast të demonstratave në kryeqytetin Albany të shtetit New York.

Njoftimi tha se incidenti është nën hetime.

Sherifi i Kontit, Moroe Todd Baxter, në rrjetet sociale tha se helikopteri u rrëzua në fushën e një fermeri dhe nuk kishte shtëpi afër.

Ndërsa guvernatori i New York-ut, Andrew M. Cuomo, në një deklaratë me shkrim tha se ai ishte “shkatërruar nga lajmet”.

“Anëtarët e Gardës Kombëtare janë ushtarët tanë që vullnetarisht shërbejnë dhe mbrojnë këtu dhe jashtë vendit”, tha Cuomo dhe urdhëroi që flamujt në të gjitha ndërtesat shtetërore sot të ulen në gjysmështizë në nder të ushtarëve.//AA

Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb