Një person ka humbur jetën dhe disa të tjerë janë plagosur në të shtënat në një kishë në Teksasin lindor.

Të shtënat ndodhën sot në mëngjes në Kishën Metodiste Starville. Zyrtarët e sigurisë kanë marrë në paraburgim një të dyshuar.

“Zemrat tona janë me viktimat dhe familjet e të vrarëve ose të plagosurve në këtë tragjedi të tmerrshme. Jam mirënjohës për oficerët e zbatimit të ligjit që kapën të dyshuarin dhe kërkoj që banorët e Teksasit të na bashkohen në lutje për ata që u ndikuan nga të shtënat e tmerrshme”, tha në një deklaratë guvernatori i Teksasit, Greg Abbott.

“Shteti i Teksasit po punon së afërmi me zyrtarët lokalë për të siguruar që drejtësia të vendoset dhe që komuniteti në Starville të ketë resurset e nevojshme gjatë kësaj kohe”, shtoi ai.

I dyshuari hyri brenda në banjën e kishës pasi kishte ikur nga disa persona, kur u përball me një pastor të armatosur.

Policia tha se me sa duket, i dyshuari e kishte marrë armën nga pastori dhe e qëlloi atë me këtë armë.

Sherifi i Qarkut, Larry Smith, tha se një person po trajtohej për plagët e marra nga të shtënat, ndërsa një tjetër po trajtohej pasi pësoi lëndime pasi u rrëzua, duke shtuar se vrasësi i dyshuar kishte një plagë të shkaktuar nga armë zjarri në dorë pasi u kap në automjetin e pastorit nga ndihmësit e sherifit.

I dyshuari po përballet me akuzë për vrasje të nivelit të parë dhe mund të dënohet me vdekje.//AA