Sekretari i Përgjithshëm i OKB-së Antonio Guterres është thellësisht i shqetësuar për përshkallëzimin e fundit të dhunës në Etiopi dhe gjendjen e jashtëzakonshme që ka shpallur vendi.

Sipas një deklarate të lëshuar të martën pasdite nga zëdhënësi i tij, “stabiliteti i Etiopisë dhe rajonit më të gjerë është në rrezik”.

Shefi i OKB-së përsëriti thirrjen e tij për një ndërprerje të menjëhershme të armiqësive dhe akses të pakufizuar humanitar për të ofruar ndihmë shpëtimtare në rajonet veriore të trazuara.

Guterres kërkoi gjithashtu “një dialog kombëtar gjithëpërfshirës për të zgjidhur këtë krizë dhe për të krijuar bazat për paqen dhe stabilitetin në të gjithë vendin”.

Në Twitter, Nënsekretarja e Përgjithshme për Çështjet Politike dhe Ndërtuese të Paqes, Rosemary DiCarlo i bëri jehonë këtij mendimi.

Sipas saj, “pasojat e mundshme të një konflikti spirale në vend dhe rajon janë të frikshme për t’u menduar, por nuk është tepër vonë për të zgjedhur dialogun”.

“Lërini armët tani,” shtoi ajo.

Sipas përditësimit të fundit nga Zyra e OKB-së për Koordinimin e Çështjeve Humanitare (OCHA), lëshuar të hënën, situata e përgjithshme në Etiopinë Veriore “mbetet e paparashikueshme, e paqëndrueshme dhe shumë e tensionuar”.

Për shkak të mungesës së karburantit për operacionet humanitare në Tigray që nga fillimi i gushtit, shumica e partnerëve humanitar kanë reduktuar ose ndërprerë aktivitetet e tyre. Dhe ka furnizime, para të gatshme, shërbime bankare dhe komunikime të pamjaftueshme.

Që nga 18 tetori, asnjë kolonë me furnizime nuk ka hyrë në Tigray. Si rezultat,ndihmat për fëmijët dhe gratë në Tigray u ulën me të paktën 50 për qind.

Ndërsa konflikti përhapet, situata humanitare në Tigray, Afar dhe Amhara vazhdon të përkeqësohet.

Luftimet po parandalojnë gjithashtu dhënien e ndihmës dhe po shkaktojnë zhvendosje, ndërprerje të mjeteve të jetesës dhe pasiguri ushqimore.