Kryeministri Boris Johnson ka pranuar sot të japë dorëheqjen, pas një sërë largimesh nga kabineti i tij.

Ndërkohë dy ish-ministra konservatorë janë shprehur për The Guardian se mendojnë se nuk është e mundur që Johnson të qëndrojë deri në vjeshtë.

“Ai duhet të largohet sonte, Raab duhet të marrë përsipër”, tha njëri prej tyre.

Një tjetër tha: “Ai duhet të dorëzojë vulat e detyrës sot dhe të shkojë. Kështu ne mund të kemi një kryeministër në detyrë”.

Një tjetër burim shumë i lartë konservator që ka qenë me Johnson gjatë 48 orëve të fundit tha se sjellja e tij nënkuptonte se ishte e rrezikshme për vendin që ai të vijonte të qëndronte në detyrë deri në vjeshtë.

“Sjellja e tij në 48 orët e fundit ishte e pamatur dhe e çrregullt. Atij nuk mund t’i besohet drejtimi i vendit deri në vjeshtë. Zoti e di se çfarë do të bëjë”, tha ai, raporton The Guardian.

Një ish-këshilltar i qeverisë tha se ishte “e rrezikshme” që Johnson të qëndronte në post. Një tjetër ish-ministër e quajti atë “një turp”.

Ndërkohë, Nicola Sturgeon, ministrja e parë e Skocisë, thotë se mendon se “nuk është e qëndrueshme” që Boris Johnson të qëndrojë kryeministër deri në vjeshtë.

 

 

Vendimi për dorëheqje i kryeministrit Johnson, ka nxitur reagime nga Btritania e Madhe dhe jo vetëm.

“Të katër kombet kanë nevojë për një qeveri të qëndrueshme të Mbretërisë së Bashkuar dhe prandaj jam i kënaqur që shoh se kryeministri tani ka bërë gjënë e duhur dhe ka rënë dakord të japë dorëheqjen,” tha ministri i parë i Uellsit, Mark Drakeford.

(BalkanWeb)

Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb