Shqipëria mori 4 medalje në Lojërat Mesdhetare “Oran 2022”. Rezultate të rëndësishme nga sportistët tanë, të cilëve u takojnë, sipas ligjit, edhe shpërblime financiare.

Paraqitjen më mbresëlënëse e realizoi atletja Luiza Gega, e cila fitoi medalje ari në garën e 3000 metrave me pengesa, si dhe vendosi rekord të ri Mesdhetar, duke thyer pikërisht rezultatin që kishte vendosur po vetë në “Tarragona 2018”.

Falë këtyre arritjeve Luiza Gega do të përfitojë 20 milionë lekë të vjetër për medaljen e artë dhe 30 milionë për rekordin mesdhetar, pra një total prej 50 milionë lekësh të vjetër.

Zelimkhan Abakarov u shpall kampion Mesdheu në stilin e lirë në mundje. Falë medaljes së artë, sportisti çeçen i natyralizuar me pasaportë shqiptare do të marrë 20 milionë lekë të vjetër, ndërsa Islam Dudaev, i cili fitoi medaljen e bronzit, do të përfitojë 8 milionë lekë të vjetër nga shteti shqiptar.

Ndërsa peshëngritësi Erkand Qerimaj, i cili u shpall nënkampion në stilin e shkëputjes, do të marrë 10 milionë lekë të vjetër për medaljen e argjendtë.

(BalkanWeb)

Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb