VLORE
Trupa gjyqësore e Gjykatës në Vlorë ka reaguar mbi shpërthimin me eksploziv në makinën e prokurorit,Alber Kuliçi. Përmes një deklaratë shpërndarë mediave, trupa gjyqësore në Vlorë, dënon me forcë krimin ndaj kolegut Kuliçi, ndërsa kërkon nga organet kompetente marrjen e masave për sigurimin e jetës dhe shëndetit të kolegut dhe familjes së tij.
“Trupa gjyqësore e Gjykatës së Rrethit Gjyqësor Vlorë shpreh indinjatën e thellë në lidhje me ngjarjen e datës 21.12.2019 ku mbeti i dëmtuar automjeti i prokurorit Albert Kuliçi, Prokuror në Prokurorinë pranë Gjykatës së Shkallës së Parë Vlorë. Veprimi kriminal i ditës së shtunë ka cenuar jo vetëm prokurorin Albert Kuliçi, por të gjithë profesionistët e sistemit të drejtësisë të cilët kryejnë me përkushtim detyrën e tyre.
E dënojmë me forcë, krimin ndaj kolegut tonë dhe kërkojmë nga të gjitha organet marrjen e masave për sigurimin e jetës dhe shëndetit të kolegut dhe familjes së tij. Në këtë kohë, ku sistemi i drejtësisë është duke pësuar një reformim të thellë e radikal, solidariteti dhe ofrimi i të gjitha garancive nga sulmet kriminale, profesionistëve si z.Kuliçi, është domosdoshmëri absolute për vazhdimin e detyrës publike dhe kthimin e besimit të publikut tek drejtësia.
Mbështesim prokurorin dhe veprimtarinë e tij në përmbushje të rregullt të detyrës pa asnjë rezervë dhe bëjmë thirrje për më shumë vëmendje në trajtimin e gjyqtarëve e prokurorëve me dinjitet.
Me bindjen që kjo ngjarje e rëndë do të zbardhjet dhe autorët e saj do të çohen para ligjit, ftojmë të gjithë faktorët vendas dhe të huaj në dënimin e këtij krimi dhe mbështetjen e organeve të drejtësisë në kryerjen e punës së tyre të vështirë.’ thuhet në deklaratë.
(BalkanWeb)
