Autoritetet amerikane besojnë se nga shpërthimi që tronditi zonën në qendër të qytetit Nashville mëngjesin e Krishtlindjes janë gjetur disa mbetje që i përkasin trupave të njerëzve.
Policia e ka cilësuar si “akt të qëllimtë” shpërthimin në një automjet në mëngjesin e Krishtlindjes në qendër të Neshvillit. Sipas zjarrfikësve, tre vetë u dërguan në spital, asnjë prej tyre me lëndime të rënda.
Zëdhënësi i policisë së qytetit Nashville të shtetit Tenesi tha se nga shpërthimi që ndodhi në orën 6:30 të mëngjesit u thyen xhama dhe u dëmtuan ndërtesa. Autoritetet besojnë se në shpërthim ishte i përfshirë një automjet. Policia tha se tre njerëz u dërguan në spital, asnjëri prej tyre në rrezik për jetën.
Policia tha gjithashtu se ka nisur një hetim në shkallë të gjerë.
Zona ku ndodhi shpërthimi është e mbushur me bare, restorante, dyqane të vogla dhe njihet si zemra turistike e qytetit.
Disa dëshmitarë thanë se zhurma e shpërthimit ishte e fortë dhe ndërtesat përreth u tronditën. Veç kësaj, u panë katër automjete në flakë ndërsa pemët në vendin e ngjarjes u shkatërruan
Kryebashkiaku i Neshvillit, John Cooper u bëri thirrje njerëzve të mos afrohen në zonë, ndërkohë që vazhdojnë hetimet. Autoritetet kanë sjellë qen që nuhasin për bomba si dhe po kontrollojnë xhirimet e kamerave të sigurisë në zonë.
Presidenti Donald Trump u informua për shpërthimin, tha një zëdhënës i Shtëpisë së Bardhë.
(BalkanWeb)
