Rritja e bashkëpunimit mes dy administratave, sidomos në shkëmbimin e informacionit, por edhe lehtësimi i procedurave për biznesin e të dy vendeve, ishin në qendër të takimit bilateral me Drejtorit të Përgjithshëm të Doganave Shqiptare, Genti Gazheli, me delegacionin e lartë të Doganave Turke, i cili kryesohej nga dy Drejtorët e Përgjitshëm, Mustafa Gümüş dhe Murat Yaman.

Takimin e përshendeti edhe Ministrja e Financave dhe Ekonomisë, Anila Denaj, edhe në frymën e bashkëpunimit të dy Qeverive.

Gjatë këtij takimi, Gazheli i njohu homologët me  risitë e sistemit doganor shqiptar, si dhe theksoi rolin e dy administratave si shumë të rëndësishëm në nxitjen, zhvillimin dhe lehtësimin e tregtisë.

Duke parë stadin e ri të marrëdhënieve mes dy vendeve, Gazheli  i propozoi  homologut  turk, thellimin e bashkëpunimit institucional nëpërmjet një MoU në shkëmbimin e informacionit periodik në funksion të mbrojtjes së intetresave shtetërorë dhe mbrojtjes konsumatore, luftën kundër trafiqeve të paligjshme, substancave narkotike, pastrimit të parave, si dhe parandalimit të kërcënimeve terroriste, me të cilat përballet sot e gjithë bota.

Drejtori i Përgjithshëm turk Gümüş, vlerësoi marrëdhëniet e deritanishme dhe se ky bashkëpunim do të thellohet më tej me nisma dhe projekte të përbashkëta në fushën e IT, logjistikës, laboratorit doganor etj.

Ndër çështjet kryesore që  u diskutuan mes delegacioneve ishin
-Bashkëpunimi në fushën Programeve dhe Menaxhimin e Riskut
-Shkëmbimin e informacionit lidhur me legjislacionin në fuqi
-Teknologjia e Informacionit dhe zhvillimet e pritshme
-Asistenca në llogjistikë
-Asistencë dhe bashkëpunim në fushën e laboratorëve doganorë

Referuar statistikave, shkëmbimet tregtare mes dy vendeve llogariten, importet nga Turqia për 5 mujorin e parë të vitit 2021 ishin në një volum prej 246,272 Ton dhe vlerë prej 33,345 mln lekë ose 244.4 mln Euro, ndërsa eksportet për këtë periudhë janë realizuar  një volum prej  35,249 Ton me një vlerë prej  2,555 mln lekë me rritje të peshës së eksporteve në drejtim të Turqinë me  + 32,009 ton dhe rritje të vlerës me + 1,704  mln lek  krahasuar me 5 mujorin e vitit 2020.

“Shifrat tregtojnë një rritje të fortë dhe të qëndrueshme të volumeve tregtare mes dy vendeve ndaj dhe administratat doganore të dy vendeve tona duhet t’í përgjigjen me të njëjtin intensitet në lehtësimin e procedurave dhe mbështetjen e tregtisë së ligjshme, mbrojtjen konsumatore dhe konkurrencës së ndershme”, tha Gazheli.

(BalkanWeb)

Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb