Fitorja në ndeshjen e parë të “Premier League” kundër Leicester nuk i ka shuar spekulimet se Jose Mourinho pritet të shkarkohet nga Manchester United.
Së fundmi zërat janë shtuar shumë dhe në pah ka dalë edhe zëvendësuesi i portugezit. Sipas “L’Equipe” Zinedin Zidan do të marrë shumë shpejt drejtimin e “djajve të kuq”.
Sipas “L’Equipe”, drejtuesit e Manchester United janë gati që të shkarkojnë nga detyra Mourinhon, që është gjithnjë e më shumë në qendër të polemikave, sidomos për lëvizjet në merkato të “djajve të kuq”, aspekt për të cilin nuk e fshehu aspak pakënaqësinë e tij.
E përditshmja franceze e përshkruan Zidane si një person që është në kërkim të stimujve të rinj, e një klub si Manchester United e tërheq padyshim shumë. Francezi po e ndjek me vëmendje të veçantë situatën te Manchester United, pasi Mourinho është në luftë me të gjithë ambientin, ku spikasin edhe përplasjet me Paul Pogbanë.
(BalkanWeb)
