Një tërmet i fortë që goditi Kroacinë me magnitudë 6.2 kishte epiqendrën afër Petrinja, por ai u ndie fuqishëm në të gjithë vendin.

Dhe sipas mediave kroate, skenat e para nga Petrinja janë të frikshme, ka shumë shkatërrime, dëgjohen britma dhe ka të plagosur si dhe të vdekur.

Siç bëhet e ditur më tej, një fëmijë gjeti vdekjen në Petrinja, konfirmoi kryetari Darinko Dumbovic. Bëhet fjalë për një vajzë 12-vjeçare.

“Si në Hiroshima, gjysma e qytetit e dëmtuar. Tani jam para një vajze që vdiq, po presim ndihmë”, ka thënë Dumbovic.

“Ne nxorëm një fëmijë të vogël katërvjeçar, qyteti është shkatërruar. Fatkeqësi, nënat qajnë për fëmijët e tyre. Ne kemi nevojë për ndihmë, kemi nevojë për shërbime të urgjencës”, ka bërë thirrje ai.